- 1
- Whakawhetai atu ki a Ihowa, karanga atu ki tona ingoa: whakakapuakina āna mahi ki waenganui o nga iwi.
- 2
- Waiata atu ki a ia, himene atu ki a ia: korerotia ana mahi whakamiharo katoa.
- 3
- Kia whakamanamana koutou ki tona ingoa tapu: kia hari nga ngakau o te hunga e rapu ana i a Ihowa.
- 4
- Rapua a Ihowa, me tona kaha: rapua tonutia tona mata.
- 5
- Maharatia ana mahi whakamiharo i mahi ai ia; ana merekara, me nga whakariteritenga a tona mangai,
- 6
- E nga uri o Aperahama, o tona pononga, e nga tamariki a Hakopa, e ana i whiriwhiri ai.
- 7
- Ko Ihowa ia ko to tatou Atua; kei te whenua katoa ana whakariteritenga.
- 8
- Mahara tonu ia ki tana kawenata, a tuku iho tuku iho, ki te kupu i kiia iho e ia ki te mano o nga whakatupuranga.
- 9
- Ki tana i whakarite ai ki a Aperahama, ki tana oati hoki ki a Ihaka;
- 10
- A whakapumautia iho e ia hei tikanga ki a Hakopa, hei kawenata mau tonu hoki ki a Iharaira.
- 11
- I a ia ra i mea, Ka hoatu e ahau ki a koe te whenua o Kanaana, hei wahi pumau mo koutou.
- 12
- I te mea he hunga torutoru ratou: he iti rawa, he manene ano ki reira.
- 13
- I a ratou e haereere ana i tenei iwi ki tera atu iwi, i tetahi rangatiratanga ki tetahi iwi ke;
- 14
- Kihai ratou i tukua e ia kia tukinotia e te tangata: he whakaaro ano ki a ratou i riria ai e ia nga kingi.
- 15
- I mea ia, Kei pa koutou ki taku i whakawahi ai: kei kino hoki ki aku poropiti.
- 16
- I karangatia ano hoki e ia te mate kai ki te whenua: whati ana i a ia nga tokotoko katoa, ara, te taro.
- 17
- I tonoa e ia he tangata ki mua i a ratou, a Hohepa, i hokoa nei hei pononga:
- 18
- I whakamamaetia nei ona waewae ki te mekameka: takoto ana ia i te rino;
- 19
- A puta noa mai tana kupu: whakamatamatauria ana ia e te kupu a Ihowa.
- 20
- I tono mai te kingi, a wetekina ana ia; te kingi o nga iwi, a tukua ana ia.
- 21
- A meinga ana ia hei ariki mo tona whare, hei rangatira mo ona taonga katoa;
- 22
- Hei herehere i ona rangatira ua pai ia, hei ako hoki i ona kaumatua kia whakaaro.
- 23
- I haere mai ano hoki a Iharaira ki Ihipa: a noho ana a Hakopa ki te whenua o Hama.
- 24
- Na ka tino whakanuia e ia tona iwi: a ka meinga ratou kia kaha i o ratou hoa riri.
- 25
- I whakakoarotia e ia o ratou ngakau kia kino ki tona iwi, kia mahi hianga ki ana pononga.
- 26
- I tonoa mai e ia a Mohi tana pononga, raua ko Arona, ko tana i whiriwhiri ai.
- 27
- Whakaputaina ana e raua ana tohu i waenganui i a ratou, me nga merekara i te whenua o Hama.
- 28
- I tonoa mai e ia te pouritanga, a kua pouri: kihai ano ratou i whakakeke mai ki tona kupu.
- 29
- I whakaputaia ketia e ia o ratou wai hei toto; a mate ake i a ia a ratou ngohi.
- 30
- I whakangahue ake to ratou whenua i nga poroka, i roto i nga whare moenga o o ratou kingi.
- 31
- I ki ia, a puta mai ana nga huihuinga namu: me nga kutu i o ratou kāinga katoa.
- 32
- I tukua iho e ia ki a ratou te whatu hei ua, me te ahi mura, ki to ratou whenua.
- 33
- I pakia ano hoki e ia a ratou waina, me a ratou piki; a whatiwhatīa ana e ia nga rakau o o ratou kāinga.
- 34
- I ki ia, a kua puta mai te mawhitiwhiti, te moka, tē taea te tatau.
- 35
- A kainga katoatia nga otaota o to ratou whenua; pau ake nga hua o to ratou oneone.
- 36
- I whakamatea katoatia ano hoki e ia nga matamua o to ratou whenua, te muanga o to ratou kaha.
- 37
- A whakaputaina mai ana ratou e ia, me te whai hiriwa, me te whai koura ano ratou, kahore hoki he tangata hurorirori i roto i o ratou iwi.
- 38
- I hari a Ihipa i to ratou haerenga atu; i mau hoki to ratou wehi ki a ratou.
- 39
- I horahia e ia te kapua hei hipoki, me te ahi hoki hei whakamārama i te po.
- 40
- I inoi ratou, a kawea mai ana e ia te koitareke; a ka makona ratou i te taro o te rangi.
- 41
- I wahia e ia te kohatu, a ka pakaru mai nga wai: rere ana i nga wahi maroke, koia ano kei te awa.
- 42
- I mahara hoki ia ki tona kupu tapu, ki a Aperahama ano hoki, ki tana pononga.
- 43
- I whakaputaina mai ano e ia tona iwi i runga i te hari, ana i whiriwhiri ai i runga i te koa.
- 44
- A hoatu ana e ia ki a ratou nga whenua o nga tauiwi: a riro mai ana i a ratou nga mauiuitanga a te iwi;
- 45
- Kia puritia ai e ratou ana tikanga, kia whakarite ai hoki i ana ture. Whakamoemititia a Ihowa.
Address: 
Phone: 
Email: