Psalms Chapter 106 - Paipera Tapu 1868 | Te Paipera Tapu 1868

Psalms Chapter 106 - Paipera Tapu 1868

1
Whakamoemititia a Ihowa, Whakawhetai atu ki a Ihowa; e pai ana hoki ia: a e pumau tonu ana tana mahi tonu.
2
Ma wai e korero nga mahi nui a Ihowa: e whakakite katoa nga whakamoemiti ki a ia?
3
Ka hari te hunga e mau ana ki te whakarite whakawa; me te kai mahi i te tika i nga wa katoa.
4
Maharatia mai au, e Ihowa, kia rite ki to manakohanga mai ki tou iwi: tirotirohia mai ahau i runga i to whakaoranga.
5
Kia kite ai ahau i te pai o au i whiriwhiri ai: kia koa ai, koa tahi me tou iwi; kia whakamanamana tahi ai me tou kāinga tupu.
6
Kua hara tahi matou me o matou mātua: kua kino matou, kua he.
7
Kihai o matou mātua i matau ki au mea whakamiharo i Ihipa, kihai i maharatia e ratou te tini o au arohatanga: heoi whakatoi ana ratou ki a ia i te moana, ae, i te moana Whero.
8
Heoi whakaorangia ana ratou e ia, he whakaaro hoki ki tona ingoa, kia mohiotia ai tona kaha.
9
I riria ano e ia te moana Whero, kua maroke: na, arahina ana ratou e ia i nga rire, ano ko waenga koraha.
10
Na, whakaorangia ake ratou e ia i te ringaringa o te tangata i kino ki a ratou; a hokoa ana ratou i roto i te ringaringa o te hoa riri.
11
A taupokina ana e nga wai o ratou hoa riri, tē toe tetahi o ratou.
12
Na, whakapono ana ratou ki ana kupu: a waiatatia ana e ratou te whakamoemiti ki a ia.
13
Hohoro tonu ano to ratou wareware ki ana mahi: kihai i taria e ratou tana whakaaro.
14
Na, ko te hiahiatanga i hiahia ai ratou i te koraha; a whakamatautau ana ratou i te Atua i te koraha.
15
Na, ka tukua atu e ia ki a ratou ta ratou i inoi ai: otiia i tonoa mai e ia he hirokitanga ki to ratou wairua.
16
I hae hoki ratou ki a Mohi i te puni, ki a Arona ano, ki te tangata tapu a Ihowa.
17
Te hamamatanga o te whenua, na horomia ana a Ratana; a taupokina iho te ropu o Apirama.
18
A mura ana te ahi i to ratou ropu; wera ana i te mura te hunga kino.
19
I hangā e ratou he kuao kau ki Horepa, a koropiko ana ki te whakapakoko i whakarewaina.
20
Na, whakaputaia ketia ana to ratou kororia kia rite ki te puru kai tarutaru.
21
Wareware ake i a ratou te Atua to ratou Kai whakaora, i mahi nei i nga mea nunui ki Ihipa,
22
I nga mahi whakamiharo ki te whenua o Hama, i nga mea whakamataku ki te Moana Whero.
23
Na, ka mea ia, kia whakangaromia ratou, kaua a Mohi tana i whiriwhiri ai te tu ki tona aroaro i te takiwa, hei arai i tana riri, kei ngaro ratou.
24
I whakakino ano ratou ki te whenua ahuareka, kihai i whakapono ki tana kupu.
25
Heoi amuamu ana i roto i o ratou teneti, kihai i whakarongo ki te reo o Ihowa.
26
Na, ka takiritia tona ringa ki a ratou, ki te turaki i a ratou i te koraha;
27
Ki te turaki i o ratou uri ki roto ki nga iwi: ki te whakamarara i a ratou ki nga whenua.
28
I whakauru ano ratou ki roto ki a Paara-peoro: a kai ana i nga patunga tapu ma nga mea mate.
29
Na, ka riri ia i a ratou hanga, a ka pakaru mai te mate ki a ratou.
30
Na, ko te whakatikanga ake o Pinehaha, ki te whakaputa whakawa: a mutu iho te mate.
31
A ka waiho tena mahi hei tika mona ki nga whakatupurauga katoa, ake ake.
32
I whakapataritari ano ratou i ia ki nga wai o te totohetanga; a hē ana a Mohi i a ratou.
33
Na ratou hoki i whakatoi tona wairua, i he ai te kupu a ona ngutu.
34
Kihai ratou i whakangaro i nga iwi i kiia mai e Ihowa ki a ratou;
35
Heoi uru ana ki roto ki nga tauiwi, a ako ana i ā ratou mahi.
36
I mahi hoki ratou ki ā ratou whakapakoko, a ka mahangatia e aua mea.
37
Ae, i patua e ratou a ratou tamariki me a ratou tamahine ma nga atua maori;
38
I whakahekea hoki nga toto hara-kore, nga toto o a ratou tamariki, o a ratou tamahine i patua, nei e ratou ma nga whakapakoko o Kanaana; a poke iho te whenua i nga toto.
39
Na, poke iho ratou i ā ratou mahi: a puremu atu ana ratou ki a ratou mahi.
40
Na, ka mura te riri a Ihowa ki tona iwi: a whakariharihangia ana e ia tona kāinga tupu.
41
A tukua ana ratou e ia ki nga ringaringa o nga tauiwi; a ka, waiho te hunga i kino ki a ratou hei kingi mo ratou.
42
Na ka tukinotia ratou e o ratou hoa riri: ka pehia e o ratou ringaringa.
43
He maha ana whakaoranga i a ratou: ko ratou ia i whakatoi i a i a ki ā ratou whakaaro, a ka whakaititia iho ratou mo ta ratou kino.
44
Ahakoa ra, i titiro ia ki to ratou matenga, i tona rongonga ai i ta ratou tangi.
45
I mahara ano ki tana kawenata ki a ratou, a rite tonu ki te tini o ana mahi aroha te putanga ketanga o ana whakaaro:
46
I meinga hoki ratou e ia kia arohaina e te hunga katoa i whakaraua atu ai ratou.
47
Whakaorangia matou, e Ihowa, e to matou Atua, kohikohia atu ano hoki matou i rota i nga tauiwi: kia whakawetai atu ai ki tou ingoa tapu, kia whakamanamana ai ki to whakamoemititanga.
48
Kia whakapaingia a Ihowa Atua o Iharaira i tua whakarere ano, a, ake ake ake: a kia mea katoa te iwi, Amine. Whakamoemititia a Ihowa.