- 1
- (Ki te tino kai whakatangi. He himene na Rawiri.) E te Atua, e whakamoemiti atu nei ahau, kei wahangu koe:
- 2
- Kua puaki hoki to mangai o te tangata kino, me te mangai o te tangata tinihanga, ki te he moku. He teka o ratou arero, e korero nei i te kino moku.
- 3
- Kei tetahi taha oku a ratou kupu mauahara, kei tetahi taha, a e whawhai pakupaku mai ana ratou ki a au.
- 4
- Ta ratou utu mo taku aroha he riri ki a au: ko ahau ia, he inoi taku.
- 5
- E homai ana hoki e ratou ki a au he kino mo te pai, he mauahara mo taku aroha atu.
- 6
- Meinga te tangata kino hei rangatira mona; kia tu a Hatana ki tona ringa matau.
- 7
- Kia tau te he ki a ia, ina whakawakia: kia waiho ano tana inoi hei hara.
- 8
- Kia torutoru ona ra; kia riro tana mahi tirotiro i tetahi atu.
- 9
- Kia pania ana tamariki, kia pouarutia ano tana wahine.
- 10
- Kia kopikopiko tonu ana tamariki, pinono ai: kia rapu kai hoki ratou i o ratou wahi mokemoke.
- 11
- Kia haoa e te kai tuku moni ana mea katoa; kia pahuatia hoki e nga tangata iwi ke ana mauiuitanga.
- 12
- Kei mau te aroha o tetahi kia ia: kei atawhai hoki tetahi i ana tamariki pani.
- 13
- Kia hatepea putia atu ona uri: a i to muri whakatupuranga kia horoia atu o ratou ingoa.
- 14
- Kia maharatia e Ihowa te kino o ona mātua: kei murua hoki te hara o tona whaea.
- 15
- Kia mau tonu ki te aroaro o Ihowa: kia hatepea atu ai e ia te maharatanga ki a ratou i runga i te whenua,
- 16
- Mona kihai i mahara ki te mahi tohu: heoi tukino ana ia i te ware, i te rawa-kore, mate iho i a ia te hunga ngakau maru.
- 17
- I pai nei ia ki te kanga, kia tae mai ano ki a ia: kihai i aro ki te manaaki, kia mamao ano hoki tena i a ia.
- 18
- I kakahu ia i te kanga ki a ia, ano ko tona kakahu: kia tae mai ano tena ki roto ki a ia, ano he wai, me te hinu hoki ki roto ki ona wheua.
- 19
- Waiho ki a ia hei kakahu hipoki mona, hei whitiki hoki e whitikiria tonutia ai ia.
- 20
- Na, hei utu tena ma Ihowa ki oku hoa riri, ki te hunga hoki e korerotia kinotia nei toku wairua.
- 21
- Ko koe ia, e Ihowa, e te Ariki, kia whakaaro ki tou ingoa, kia puta hoki tau mahi maku: whakaorangia ahau, e pai ana hoki tau mahi tohu.
- 22
- He ware hoki ahau, he rawa-kore, kua mamae hoki toku ngakau i roto i a au.
- 23
- Ka riro ahau me te atarangi e whakawairua kau ana: e peipeia ana ahau me he mawhitiwhiti.
- 24
- Hurorirori kau oku turi i te noho puku; a e kohia ana te ngako o oku kikokiko.
- 25
- Kua waiho ahau hei tawainga ma ratou: ta ratou kitenga i a au, oioi ana o ratou mātenga.
- 26
- Awhinatia mai ahau, e Ihowa, e toku Atua: kia rite ki tou aroha tau whakaoranga i a au.
- 27
- Kia matau ai ratou ko tou ringaringa tenei: nau tenei, e Ihowa, i mea.
- 28
- Ma ratou e kanga, mau ia e manaaki: kia whakama ratou ina whakatika; a kia hari to pononga.
- 29
- Kia whakakakahuria oku hoa riri ki te whakama, a kia hipokina mai to ratou numinumitanga hei koroka mo ratou.
- 30
- Ka tino whakawhetai atu toku mangai kia Ihowa, ka whakamoemiti atu ano ahau ki a ia i waenganui o te mano.
- 31
- E tu hoki ia ki te ringaringa matau o te rawa-kore, hei whakaora i a ia i te hunga e whakahe ana i tona wairua.
Address: 
Phone: 
Email: