Psalms Chapter 125 - Paipera Tapu 1868 | Te Paipera Tapu 1868

Psalms Chapter 125 - Paipera Tapu 1868

1
(He waiata; he pikitanga.) Te hunga e whakawhirinaki ana ki a Ihowa ka rite ki maunga Hiona, e kore nei e taea te whakangaueue, e pumau tonu ana ake ake.
2
E karapotia ana a Hiruharama e nga maunga, me tona iwi ano hoki e karapotia ana e Ihowa inaianei, a ake tonu atu.
3
E kore hoki te tokotoko a te whakaaaro-kore e waiho tonu i runga i te wahi o te hunga tika: kei totoro te ringa o te hunga tika ki te kino.
4
Kia pai tau mahi, e Ihowa, ki te hunga pai, ki te hunga ano hoki e tika ana o ratou ngakau.
5
Te hunga ia e peka ke ana ki o ratou ara kopikopiko, ma Ihowa ratou e arahi tahi atu me nga kai mahi i te kino; ka mau ia te rongo ki a Iharaira.