- 1
- Whakamoemititia a Ihowa, whakamoemititia te ingoa o Ihowa, whakamoemititia, e nga pononga a Ihowa;
- 2
- E te hunga e tu ana i roto i te whare o Ihowa, i nga marae o te whare o to tatou Atua.
- 3
- Whakamoemititia a Ihowa; he pai hoki a Ihowa; himene atu ki tona ingoa; he mea ahuareka hoki tena.
- 4
- Kua whiriwhiria hoki e Ihowa a Hakopa mona, a Iharaira hei tino taonga mona.
- 5
- E matau ana hoki ahau e nui ana a Ihowa: kei runga atu hoki to tatou Ariki i nga atua katoa.
- 6
- Kua oti i a Ihowa ana mea katoa i pai ai, i te rangi, i te whenua, i nga moana, i nga wahi hohonu katoa.
- 7
- Nana i pupu ake ai nga kohu i nga pito o te whenua: i hangā e ia nga uira mo te ua; e whakaputaina mai ana e ia te hau i roto i ona whare taonga.
- 8
- Nana nei i patu nga whanau matamua o Ihipa, a te tangata, a te kararehe.
- 9
- I tono nga tohu, me nga merekara ki waenganui ou, e Ihipa: ki runga ki a Parao ratou ko ana pononga katoa.
- 10
- Nana i patu nga iwi nunui, i whakamate hoki nga kingi rahi;
- 11
- A Hihono kingi o nga Amori, raua ko Oka kingi o Pahana, me nga rangatiratanga katoa o Kanaana;
- 12
- A homai ana e ia to ratou whenua hei kāinga pumau, hei kāinga pumau mo Iharaira, mo tana iwi.
- 13
- E Ihowa, pumau tonu tou ingoa, me to maharatanga, e Ihowa, ki tera whakatupuranga, ki tera whakatupuranga.
- 14
- No te mea hoki ka whakarite whakawa a Ihowa mo tana iwi; a ka puta ke mai tana whakaaro ki ana pononga.
- 15
- He hiriwa, he koura nga whakapakoko a nga tauiwi, he mahi na nga ringaringa o te tangata.
- 16
- He mangai o ratou, a, kahore e korero: he kanohi o ratou, a, kahore e kite.
- 17
- He taringa o ratou, a, kahore e rongo; kahore ano hoki he manawa i o ratou mangai.
- 18
- Rite tonu ki a ratou o ratou kai hanga; me nga tangata katoa e whakawhirinaki atu ana ki a ratou.
- 19
- Whakapaingia a Ihowa, e te whare o Iharaira; whakapaingia a Ihowa, e te whare o Arona.
- 20
- Whakapaingia a Ihowa, e te whare o Riwai; whakapaingia a Ihowa, e te hunga katoa e wehi ana i a Ihowa.
- 21
- Kia whakapaingia a Ihowa i roto i Hiona, e noho nei i Hiruharama. Whakapaingia a Ihowa.
Address: 
Phone: 
Email: