Psalms Chapter 143 - Paipera Tapu 1868 | Te Paipera Tapu 1868

Psalms Chapter 143 - Paipera Tapu 1868

1
(He himene na Rawiri.) E Ihowa, whakarongo mai ki taku inoi, kia titaha mai tou taringa ki aku inoi: whakahokia mai he kupu ki a au i runga i tou pono, i runga i tou tika.
2
A kaua e anga e whakawa ki to pononga: ki tau titiro hoki e kore tetahi mea ora e whakatikaia.
3
Kua tukinotia hoki toku wairua e te hoa riri; patua iho e ia toku ora ki raro ki te whenua: meinga ana ahau e ia kia noho i te pouri, kia rite ki nga tupapaku onamata.
4
Na reira i ngaro ai toku wairua i roto i a au: moti rawa toku ngakau i roto i a au.
5
E mahara ana ahau ki nga ra onamata; e whakaaro ana ki au mahi katoa, e whakaaroaro ana ki nga meatanga a ou ringaringa.
6
Totoro tonu oku ringaringa ki a koe: e hiainu ana toku wairua ki a koe, ano he whenua mate-wai. Hera.
7
Hohoro te whakahoki kupu mai ki a au, e Ihowa, ka hemo toku wairua: kei hunā tou mata ki a au; kei rite ahau ki te hunga e heke atu ana ki te poka.
8
Meinga ahau kia rongo i tou aroha i te ata, e whakawhirinaki atu ana hoki ahau ki a koe: meinga ahau kia matau ki te huarahi e haere ai ahau; kua ara atu nei hoki toku wairua ki a koe.
9
Whakaorangia ahau, e Ihowa, i oku hoa riri: ka kuhu atu nei ahau ki roto ki a koe.
10
Whakaakona ahau ki te mea i tau e pai ai; ko koe hoki toku Atua: e pai ana tou Wairua; arahina atu ahau ki te whenua o te tika.
11
E Ihowa, whakahauorangia ahau; kia whakaaro hoki ki tou ingoa, kia whakaaro ki tou tika, a whakaputaina ake toku wairua i roto i te pouri.
12
Kia aroha mai hoki koe, a hunā oku hoa riri: whakangaromia katoatia ano hoki nga kai tukino o toku wairua: ko ahau hoki to pononga.