- 1
- (Na Rawiri, he whakamoemiti.) Ka whakanui ahau i a koe, e taku Atua, e te Kingi: ka whakapaingia ano hoki e ahau tou ingoa ake ake.
- 2
- Ka whakapai atu ahau ki a koe i nga ra katoa: ka whakamoemiti hoki ki tou ingoa ake ake.
- 3
- E nui ana a Ihowa, kia nui ano te whakamoemiti ki a ia: e kore e taea tona nui te whakaaro.
- 4
- Ma tetahi whakatupuranga e whakamoemiti au mahi, tae noa atu ki tetahi whakatupuranga; e korero hoki au mahi nunui.
- 5
- Ka korerotia e ahau te kororia, te honore o tou nui, me au mahi whakamiharo.
- 6
- Ka korerotia ano te kaha o au mahi whakamataku: maku ano e korero tou nui.
- 7
- Ka whakapuakina e ratou te maharatanga ki te nui o tou pai: ka waiatatia ano tou tika.
- 8
- He atawhai a Ihowa, he aroha: e puhoi ana ki te riri, e nui ana tana mahi tohu.
- 9
- E pai ana a Ihowa ki nga mea katoa; kei runga ano tona aroha i ana mahi katoa.
- 10
- E whakamoemititia ana koe, e Ihowa, e au mahi katoa: e whakapaingia ana e tou hunga tapu.
- 11
- Ma ratou e korero te kororia o tou kingitanga, e kauwhau hoki tou kaha.
- 12
- Kia mohiotia ai e nga tama a te tangata ana mahi nui, me te kororia ingoa nui o tona kingitanga.
- 13
- He kingitanga mutunga-kore tou kingitanga; i puta noa atu i nga whakatupuranga katoa tou rangatiratanga.
- 14
- E tautokona ana e Ihowa te hunga katoa e hinga ana: e whakaarahia ake ana hoki e ia te hunga katoa kua whakapikoa iho.
- 15
- E tatari ana ki a koe nga kanohi o te katoa: a e hoatu ana e koe ta ratou kai ki a ratou i te wa e tika ai.
- 16
- Te whakatuwheratanga o tou ringaringa: makona tonu i a koe te hiahia o nga mea ora katoa.
- 17
- E tika ana nga ara katoa a Ihowa: e tapu ana hoki ana mahi katoa.
- 18
- E tata ana a Ihowa ki te hunga katoa e karanga atu ana ki a ia: ki te hunga katoa e karanga pono atu ana ki a ia.
- 19
- Ka whakamanā e ia te hiahia o te hunga e wehi ana i a ia: e whakarongo hoki ia ki ta ratou tangi, a ka whakaora i a ratou.
- 20
- Ko Ihowa hei tiaki i te hunga katoa e aroha ana ki a ia: te hunga kino katoa ia e whakangaromia e ia.
- 21
- Ma toku mangai e korero te whakamoemiti ki a Ihowa: kia whakapai ano hoki nga kikokiko katoa ki tona ingoa tapu ake ake.
Address: 
Phone: 
Email: