- 1
- (Ki te tino kai whakatangi. He himene na te pononga a Ihowa, na Rawiri. Nana i whakahua nga kupu o tenei waiata ki a Ihowa i te ra i whakaorangia ai ia i te ringa o ona hoa riri katoa, i te ringa ano o Haora. I mea ano ia.) Ka aroha ahau ki a koe, e Ihowa, e toku kaha.
- 2
- Ko Ihowa toku teko, me taku pourewa, toku kai whakaora ano hoki; toku Atua, toku kamaka, e whakawhirinaki atu ai ahau; taku whakangungu rakau, me te haona o toku whakaoranga, me toku pa tiketike.
- 3
- Ka karanga atu ahau ki a Ihowa, e tika nei kia whakamoemititia: a ka ora i aku hoa riri.
- 4
- I karapotia mai ahau e nga whakawiringa a te mate, a whakawehia ana ahau e nga waipuke o te kino.
- 5
- I karapotia mai ahau e nga whakawiringa a te reinga, i haukotia e nga mahanga a te mate.
- 6
- I karanga atu ahau ki a Ihowa i toku paweratanga, i hamama atu hoki ki toku Atua: i whakarongo mai ia ki toku reo i roto i tona temepara, i tae atu ano taku hamamatanga ki tona aroaro, ki ona taringa.
- 7
- Na, ka ngaueue te whenua, ka ru, wiri ana nga putake o nga maunga, ngaueue ana i tana riri.
- 8
- I kake atu he paowa i ona pongaponga, a kai ana te kapura o roto o tona mangai, ngiha noa nga waro.
- 9
- I whakapingoretia e ia nga rangi, a heke iho ana, a i raro te pouri i ona waewae.
- 10
- I eke ia ki runga i te kerupa, a rere ana: i rere ia i runga i nga parirau o te hau.
- 11
- I meinga e ia te pouri hei wahi ngaro mona; ko nga wai pouri tona teneti i tetahi taha ona, i tetahi taha, me nga kapua matotoru o te rangi.
- 12
- I rere atu ona kapua matotoru i te wherikotanga o tona aroaro: te whatu, me nga waro kapura.
- 13
- I papā ano hoki te whatitiri a Ihowa i nga rangi, a puaki ana te reo o te Runga-rawa; he whatu, he waro kapura.
- 14
- I kokiritia e ia ana pere, a marara ana ratou: i koperea mai hoki e ia nga uira, a whati ana ratou.
- 15
- Katahi ka kitea nga whakatakere o nga wai, a ka takoto kau nga putake o te ao i to whakatupehupehunga, e Ihowa, i te whengunga o te manawa o ou pongaponga.
- 16
- I tono karere mai ia i runga, ka mau ki a au; toia ake ana ahau e ia i roto i nga wai maha.
- 17
- Nana ahau i whakaora i taku hoa riri kaha, i te hunga ano hoki e kino mai ana ki a au; no te mea he kaha rawa ratou i a au.
- 18
- I huakina tatatia mai ahau e ratou i te ra o toku matenga; ko Ihowa ia toku whakawhirinakitanga.
- 19
- I whakaputaina mai ahau e ia ki te wahi nui, i whakaorangia ahau e ia; no te mea hoki i whakaahuareka mai ia ki a au.
- 20
- Rite tonu ki taku mahi tika ta Ihowa utu ki a au: rite tonu ki te ma o oku ringa tana i whakahoki mai ai ki a au.
- 21
- Moku i pupuri i nga ara o Ihowa, a kihai i he, i whakarere i toku Atua.
- 22
- Kei mua tonu hoki i a au ana whakariteritenga katoa, kihai ano hoki i whakamataratia atu i a au ana tikanga.
- 23
- Tapatahi tonu hoki toku whakaaro ki tona aroaro, a i tiaki ano ahau i a au kei kino.
- 24
- Na, ka homai e Ihowa he utu ki a au, he mea rite tonu ki toku tika, ki te ma o oku ringaringa i tona aroaro.
- 25
- He tangata atawhai, ka atawhai hoki koe; he tangata tika, ka tika hoki koe.
- 26
- He tangata ma, ka ma hoki koe; he tangata whakakeke, ka whakakeke hoki tau mahi.
- 27
- E whakaorangia hoki e koe te iwi ngakau mamae; ka whakahokia iho ano e koe ki raro nga kanohi whakakake.
- 28
- Mau hoki e whakau taku rama: ma Ihowa, ma toku Atua, e whakamārama toku pouritanga.
- 29
- Nau hoki ahau i rere ai na waenganui atu i te ropu: na toku Atua hoki i pekea ai e au te taiepa.
- 30
- Te Atua, tika tonu tana ara: e para-kore ana te kupu a te Atua, he whakangungu rakau ia ki te hunga katoa e whakawhirinaki atu ana ki a ia.
- 31
- Ko wai oti te Atua, ki te kahore a Ihowa? ko wai hoki he kamaka, ki te kahore to tatou Atua?
- 32
- Ko te Atua hei whitiki i a au ki te kaha, hei mea ano kia tino tika taku ara.
- 33
- Ko ia hei mea i oku waewae kia rite ki o nga hāta: mana hoki ahau e whakatu ki runga ki oku wahi tiketike.
- 34
- Ko ia hei whakaako i oku ringaringa ki te whawhai, a whati ana te kopere parahi i oku ringa.
- 35
- Kua homai ano hoki e koe ki a au te whakangungu rakau o to whakaoranga: puritia ana ahau e to ringaringa matau, whakanuia ana e to whakaaro mahaki.
- 36
- I whakanuia e koe aku takahanga i raro i a au; tē paheke oku waewae.
- 37
- I arumia e ahau oku hoa riri, mau iho ratou i a au; kihai ano hoki ahau i tahuri mai, a ngaro noa ratou.
- 38
- Mongamonga noa ratou i a au, kihai ano i kaha te whakatika ake: hinga ana ratou ki raro i oku waewae.
- 39
- Nau hoki ahau i whitiki ki te kaha mo te whawhai; piko ana i a koe ki raro i a au te hunga e whakatika mai ana ki a au.
- 40
- I homai ano e koe ki a au nga kaki o oku hoa riri: hunā iho e ahau te hunga i kino mai ki a au.
- 41
- I karanga ratou, heoi kahore he kai whakaora; ki a Ihowa, otira kihai i whakahoki kupu mai ki a ratou.
- 42
- Na, ka tukia ratou e ahau a rite noa ratou ki te puehu e puhia ana e te hau: akiritia atu ana ratou ki waho, ano he paru no te huarahi.
- 43
- Kua whakaorangia ahau e koe i nga ngangautanga a te iwi; kua meinga ahau e koe hei rangatira mo nga tauiwi: hei apa moku te iwi kahore nei i matauria e ahau.
- 44
- Kia rongo kau te taringa ki a au, ka kakama tonu mai ratou ki a au; nga tangata iwi ke ngohe kau ki a au.
- 45
- Ka memeha haere nga tangata iwi ke: ka puta wehi mai hoki i roto i o ratou kuhunga.
- 46
- E ora ana a Ihowa, kia whakapaingia hoki toku kamaka, kia whakanuia ano hoki te Atua o toku whakaoranga.
- 47
- Ko te Atua toku kai rapu utu: mana e pehi iho nga iwi ki raro i a au.
- 48
- Nana ahau i mawhiti mai ai i oku hoa riri, ae ra mau ahau e mea kia teitei ake i te hunga e whakatika mai ana ki a au; kua whakaorangia ahau e koe i te tangata tutu.
- 49
- Mo konei ka whakawhetai atu ai ahau ki a koe, e Ihowa, i waenganui i nga tauiwi: ka himene ano ahau ki to ingoa.
- 50
- He nui nei tana whakaoranga i tona Kingi; e whakaputa aroha ana ia ki tona tangata i whakawahi ai, ki a Rawiri ratou ko ona uri ake ake ake.
Address: 
Phone: 
Email: