- 1
- (Ki te tino kai whakatangi. He himene na Rawiri.) E korerotia ana e nga rangi te kororia o te Atua; a e whakaaturia ana e te kikorangi te mahi a ona ringa.
- 2
- E puaki mai ana te reo o tena rangi, o tena rangi, e whakaatu mohiotanga mai ana hoki tena po, tena po.
- 3
- Kahore he hamumutanga, kahore he kupu, kahore e rangona to ratou reo.
- 4
- Kua puta atu to ratou aho ki te whenua katoa, a ratou kupu, a, te pito ra ano o te ao. Whakaturia ana e ia ki reira te tapenakara mo te ra;
- 5
- A e puta mai ana ia me he tane marena hou i tona whare moenga, whakaī ana ia, pera ana me te tangata kaha e mea ana ki te oma whakataetae.
- 6
- Tona putanga mai kei tetahi pito o te rangi, a whawhe noa ki tetahi pito: kahore hoki tetahi mea e ngaro i tona mahanatanga.
- 7
- Tapatahi tonu te ture a Ihowa, he mea whakatahuri i te wairua: pono tonu nga whakaaturanga a Ihowa, e whakawhaiwhakaaro ana i te kuare.
- 8
- E tika ana nga akoranga a Ihowa, e whakahari ana i te ngakau, e ma ana te whakahaunga a Ihowa, e whakamārama ana i nga kanohi.
- 9
- E ma ana te wehi ki a Ihowa, e pumau tonu ana ake ake: e pono ana nga whakaritenga whakawa a Ihowa, tika kau ano hoki.
- 10
- Engari ena e hiahiatia ana i te koura, ae, i te tino koura ahakoa maha reka atu i te honi, i te maturuturunga iho nga honikoma.
- 11
- Na ena ano hoki to pononga i whakatupato; a he nui te utu ki te puritia ena mea.
- 12
- Ko wai e matau ana ki ona hē? whakamakia atu oku hara puku.
- 13
- Puritia ano to pononga kei riro i nga hara whakakake, hei rangatira moku: ko reira au tu tika ai, a ka watea i te hē nui.
- 14
- Kia manakohia nga kupu a toku mangai me nga whakaaro a toku ngakau i tou aroaro, e Ihowa, e toku kamaka, e toku kai hoko.
Address: 
Phone: 
Email: