- 1
- (Na Rawiri.) Ka ara atu nei toku wairua ki a koe, e Ihowa.
- 2
- E toku Atua, e whakawhirinaki atu ana ahau ki a koe: kei whakama ahau, aua oku hoa riri e tukua kia whakaputa mai ki a au.
- 3
- Ae, aua tetahi o te hunga e tatari ana ki a koe e tukua kia whakama: kia whakama te hunga e tinihanga noa ana.
- 4
- Whakakitea mai ki a au o ara, e Ihowa; whakaakona ahau ki o huarahi.
- 5
- Arahina ahau i tou pono, whakaakona hoki ahau: ko koe hoki te Atua o toku whakaoranga; pau noa te ra i a au e tatari nei ki a koe.
- 6
- E Ihowa, kia mahara ki āu mahi tohu, ki āu mahi aroha; nonamata riro hoki ena.
- 7
- Kaua e maharatia nga ara o taku taitamarikitanga, me aku kino: mahara mai koe ki a au, e Ihowa, kia rite ki tau mahi tohu, kia whakaaro ki to pai.
- 8
- E pai ana, e tika ana a Ihowa, a ka whakaakona e ia te hunga hara ki te huarahi.
- 9
- Ka arahina e ia te hunga mahaki i runga i te whakarite whakawa: ka akona hoki e ia te hunga mahaki ki tona ara.
- 10
- He mahi tohu, he pono nga ara katoa o Ihowa ki te hunga e whakarite ana i tana kawenata me ana whakaaturanga.
- 11
- Kia mahara ki to ingoa, e Ihowa, a murua taku kino, he nui nei hoki.
- 12
- Ko wai te tangata e wehi ana ki a Ihowa? ka whakaako ia i a ia ki te ara e pai ai ia.
- 13
- Ka noho tona wairua i runga i te pai, a ka riro mai te whenua i tona uri.
- 14
- Kei te hunga e wehi ana i a ia te mea ngaro a Ihowa; a mana e whakakite ki a ratou tana kawenata.
- 15
- E tau tonu ana oku kanohi ki a Ihowa; mana hoki e unu ake oku waewae i te kupenga.
- 16
- Tahuri mai ki a au, tohungia hoki ahau; e mokemoke ana hoki ahau, e mamae ana te ngakau.
- 17
- Kua whakanuia nga whakapawera o toku ngakau: whakaputaina atu ahau i roto i nga mea e pehi nei i a au.
- 18
- Tirohia mai toku mate me toku mamae, a murua katoatia oku hara.
- 19
- Tirohia mai oku hoa riri, he tokomaha hoki ratou: a he nanakia te kino e kino nei ratou ki a au.
- 20
- Tiakina toku wairua, a whakorangia ahau: kei whakama ahau; e whakawhirinaki atu ana hoki ahau ki a koe.
- 21
- Tukua ma te ngakau tapatahi, ma te tika ahau e tiaki; e tumanako atu ana hoki ahau ki a koe.
- 22
- Hokona, e te Atua, a Iharaira i roto i ona whakapawera katoa.
Address: 
Phone: 
Email: