Psalms Chapter 30 - Paipera Tapu 1868 | Te Paipera Tapu 1868

Psalms Chapter 30 - Paipera Tapu 1868

1
(He himene, he waiata mo te tainga o te kawa o te whare o Rawiri.) Ka whakanui ahau i a koe, e Ihowa; nau hoki ahau i hapai ake, a kihai i tukua oku hoa riri kia hari mai ki a au.
2
E Ihowa, e toku Atua, i karanga atu ahau ki a koe, a kore ake toku mate i a koe.
3
E Ihowa, nau i whakaputa ake toku wairua i roto i te rua tupapaku; nau ahau i whakaora ake kei heke atu ki te poka.
4
Himene atu ki a Ihowa, e tona hunga tapu, whakawhetai atu hoki ina mahara ki tona tapu.
5
He iti hoki te wahi e riri ai ia; he oranga ki te manakohia mai e ia: e tau iho te tangi i te ahiahi, a i te ata he hari.
6
I mea ahau i taku wa i kake ai, E kore au e whakangaueuetia a muri ake nei.
7
He manakohanga mai nau, e Ihowa, i whakaungia ai e koe te tu o taku maunga: i hunā e koe to mata, a whakararua noatia iho ahau.
8
E Ihowa, i karanga atu ahau ki a koe, i inoi atu hoki ki a Ihowa.
9
He aha te painga o oku toto, ina heke atu ahau ki te poka? Ma te puehu koia koe e whakamoemiti? mana oti e whakapuaki to pono?
10
Whakarongo, E Ihowa, tohungia hoki ahau: e Ihowa, ko koe ano hei awhina moku.
11
Kua whakaputaina ketia e koe taku tangihanga hei kanikaninga: kua wetekina atu e koe toku kakahu taratara, a whikitiria ana ahau e koe ki te koa.
12
Hei mea e himene atu ai toku kororia ki a koe, kore ake e wahangu. E Ihowa, e toku Atua, ka whakawhetai atu ahau ki a koe ake ake ake.