Psalms Chapter 32 - Paipera Tapu 1868 | Te Paipera Tapu 1868

Psalms Chapter 32 - Paipera Tapu 1868

1
(Na Rawiri: he Makiri.) Ka hari te tangata kua oti tana mahi tutu te muru, tona hara te hipoki.
2
Ka hari te tangata kahore nei e whakairia e Ihowa he hara ki a ia, a kahore he hianga i tona wairua.
3
I a au kihai i kuihi, ngahengahe kau oku iwi i taku auetanga i te ra roa.
4
No te mea i taimaha iho tou ringa ki runga ki a au i te ao, i te po; kua riro toku makukutanga, kua rite ki te maroketanga o te raumati. Hera.
5
I whakina e ahau toku hara ki a koe, kihai hoki i huna i taku kino. I mea ahau, Ka whakina aku mahi tutu ki a Ihowa; a murua ana e koe te kino o toku hara. Hera.
6
Mo konei ka inoi atu ki a koe nga tangata tapu katoa i te wa e kitea ai koe: he pono ka ngawha nga wai nui, e kore e tata mai ki a ia.
7
Ko koe toku piringa; mau ahau e whakaora i te pouri, mau ahau e karapoti ki nga waiata whakaora. Hera.
8
Ka tohutohungia koe e ahau, ka whakaakona koe ki te ara e haere ai koe; ma toku kanohi koe e arahi.
9
Kei rite koutou ki te hoiho, ki te muera ranei, kahore nei he matauranga; he mea kuku nei o raua kauae ki te paraire, ki te moka, ki te kore e tata mai ki a koe.
10
He tini nga mea whakapouri mo te tangata hara: te tangata ia e whakawhirinaki ana ki a Ihowa, ka karapotia ia e te atawhai.
11
Kia koa ki a Ihowa, whakamanamana, e te hunga tika: kia hari, hamama, e te hunga ngakau tika katoa.