- 1
- (Na Rawiri.) Whakawakia, e Ihowa, te hunga e whakawa ana i a au, whawhaitia te hunga e whawhai mai nei ki a au.
- 2
- Kia mau ki te whakangungu rakau, ki te puapua; whakatika ake hei awhina moku.
- 3
- Unuhia te tao, araia te ara o te hunga e tukino nei i ahau: ki mai ki toku wairua, Ko au to whakaoranga.
- 4
- Kia whakama, kia numinumi, te hunga e whai ana kia whakamatea ahau: kia whakahokia ki muri, kia whakapoauautia te hunga e whakatakoto ana i te kino moku.
- 5
- Kia rite ratou ki te papapa e puhia ana e te hau; a kia turakina ratou e te anahera a Ihowa.
- 6
- Kia pouri to ratou ara, kia pahekeheke: kia whaia ano ratou e te anahera a Ihowa.
- 7
- Kahore hoki he rawa i hunā ai e ratou te poka o ta ratou kupenga moku, ta ratou i keri take-kore nei kia mate ai ahau,
- 8
- Kia rokohanga poauautia ia e te whakangaromanga; kia mau ano ko ia i tana kupenga i huna ai: kia taka ia ki taua tino whakangaromanga.
- 9
- A ka koa toku wairua ki a Ihowa, ka hari ki tana whakaoranga.
- 10
- Ka ki katoa ake oku wheua, e Ihowa, ko wai te rite ana ki a koe, e whakaorangia ana hoki te iti i te tangata e kaha ake ana i a ia, ae, te iti, te rawa-kore i tona kai pahua?
- 11
- I whakatika mai nga kai whakapae teka: whakawakia ana ahau mo nga mea kihai nei au i matau atu.
- 12
- I utua mai e ratou taku pai ki te kino, a whakatupu pani ana toku wairua.
- 13
- Tena ko ahau, i a ratou e mate ana, he kahu taratara toku, whakawaikauere ana ahau i toku wairua, kihai i kai: a hoki mai ana taku inoi ki toku uma.
- 14
- Toku ahua me te mea he whanaunga ia, he teina noku: kupapa noa iho ahau, me te mea he tangata e tangi ana ki tona whaea.
- 15
- I toku paheketanga ia koa ana ratou, huihui ana; huihui ana nga tangata kino noa iho hei hoa riri moku, kihai ano ahau i mohio; haehae ana ratou i a au, kihai hoki i mutu.
- 16
- I roto ratou i nga tangata tinihanga, i nga kai whakakata o nga hakari, tetea mai ana o ratou niho ki a au.
- 17
- E te Ariki, kia pehea te roa o tau titiro kau mai? whakaorangia toku wairua i ā ratou whakangaromanga, taku e aroha nei i nga raiona.
- 18
- Ka whakawhetai atu ahau ki a koe i roto i te whakaminenga nui, ka whakamoemiti atu ki a koe i roto i te iwi kaha.
- 19
- Kei hari mai ki a au aku hoa riri pokanoa; kei whakakini mai nga kanohi o te hunga e kino pakupaku mai ana ki a au.
- 20
- Ehara hoki ta ratou i te korero mo te rangimarie; heoi kei te whakatakoto i te mea tinihanga mo te hunga ata noho o te whenua.
- 21
- Ina, hamama mai ana o ratou mangai ki a au, e ki mai ana, Ha, ha, kua kite o matou kanohi.
- 22
- Kua kite koe, e Ihowa: kaua ra e wahangu, e te Ariki, kei matara atu koe i a au.
- 23
- Oho ake, e ara hoki ki te whakarite i taku whakawa, ki taku tautohetohe, e toku Atua, e toku Ariki.
- 24
- Kia rite ki tou tika taku whakawakanga, e Ihowa, e toku Atua: kei koa mai ano ratou ki a au.
- 25
- Kei mea ratou i roto i o ratou ngakau, Ha, ko ta matou tena i pai ai: kei mea ratou, Kua horomia ia e tatou.
- 26
- Kia whakama, kia numinumi ngatahi, te hunga e koa mai ana ina he ahau: kia whakakakahuria ki te whakama, ki te numinumi, te hunga e whakakake mai ana ki a au.
- 27
- Kia hamama i te hari, kia koa te hunga e pai mai ana ki taku mahi tika: ae, kia mea tonu ratou, Kia whakanuia a Ihowa e whakapai nei ki te oranga o tana pononga.
- 28
- A ka korerotia e toku arero tau mahi tika, me te whakamoemititanga ki a koe i te ra roa.
Address: 
Phone: 
Email: