Psalms Chapter 39 - Paipera Tapu 1868 | Te Paipera Tapu 1868

Psalms Chapter 39 - Paipera Tapu 1868

1
(Ki te tino kai whakatangi, ki a Ierutunu. He himene na Rawiri.) I mea ahau, Ka ata whakaaro ahau ki aku huarahi, kei hara toku arero; ka tiakina toku mangai, paraire rawa, i te mea kei toku aroaro te tangata kino.
2
I whakamoroki ahau, i wahangu, kihai i puaki taku kupu, ahakoa pai; a ka oho toku mamae.
3
Werawera ana toku ngakau i roto i a au, i a au e whakaaro ana ka kā te ahi, a ka korero toku arero.
4
E Ihowa, meinga ahau kia matau ki toku mutunga, ki te maha hoki o oku ra, ehia ranei: kia matau ai ahau he mea memeha noa ahau.
5
Titiro hoki, kua whakaritea nei e koe oku ra, ano he whanuitanga ringaringa; he kahore noa iho ano oku tau i tou aroaro: ahakoa u noa te tu o nga tangata katoa, he mea memeha kau. Hera.
6
He pono kei roto i te atarangi te tangata e kopikopiko noa ana; he pono e ohorere noa ana ratou: e ami ana ia i te taonga, a kahore e matau ma wai ranei e kohi.
7
Na, he aha taku e tatari atu nei, e te Ariki? ko koe taku e tumanako atu ai.
8
Whakaorangia ahau i aku mahi tutu katoa: kaua ahau e waiho hei tawainga ma te wairangi.
9
Wahangu ana ahau, kihai i kuihi toku mangai: he meatanga hoki tenei nau.
10
Nekehia atu i a au tau whiu: ka ngaro ahau i te pakinga a to ringa.
11
Ka pakia e koe te tangata, ka whakatupehupehutia mo te hara, ka meinga e koe tona ataahuatanga kia memeha, kia pera me te purehurehu: he pono he mea teka noa nga tangata katoa. Hera.
12
Whakarongo ki taku inoi, e Ihowa, kia titaha mai tou taringa ki taku karanga; kei wahangu koe ki aku roimata: he heke hoki ahau nau, he manene, he pera me oku mātua katoa.
13
Kia ata hanga mai ki a au, kia ta ai toku manawa, keiwha haere atu ahau i konei, a ka kahore noa iho.