- 1
- (Ki te tino kai whakatangi. He Makiri, ma nga tama a Koraha.) Rite tonu ki te hāta e kihakiha nei ki nga manga wai toku ngakau e kihakiha nei ki a koe, e te Atua.
- 2
- E hiainu ana toku wairua ki te Atua, ki te Atua ora: ahea ahau tae atu ai, puta atu ai ki te aroaro o te Atua?
- 3
- Ko oku roimata taku kai i te ao, i te po, i a ratou e mea tonu mai nei ki a au, Kei hea tou Atua?
- 4
- Ka mahara ahau ki enei mea, me te wai toku ngakau e maringi ana i roto i a au: i haere hoki ahau i roto i te huihui, i haere tahi matou ki te whare o te Atua, me te reo o te hari, o te whakamoemiti, me te huihui e mea hakari ana.
- 5
- He aha koe i piko iho ai, e toku wairua? i ohorere ai hoki i roto i a au? tumanako atu ki te Atua; tera ano ahau e whakawhetai atu ki a ia, mo te whakaoranga a tona mata.
- 6
- E toku Atua, e piko iho ana toku wairua i roto i ahau: koia ahau ka mahara ai ki a koe i te whenua o Horano, o nga Heremoni, i Maunga Mitara.
- 7
- Rarā ana tetahi rire ki tetahi rire i te harurutanga o au awhiowhio wai: tika ana au ngaru katoa me au tuatea i runga i a au.
- 8
- Ahakoa ra e whakahaua mai ano e Ihowa tona atawhai i te awatea; a he waiata taku ki a ia i te po, he inoi ki te Atua o taku ora.
- 9
- Ka mea atu ahau ki te Atua, E toku kohatu, He aha koe i wareware ai ki a au? he aha ahau ka haere pouri ai i te tukinotanga a te hoa riri?
- 10
- Ano he hoari i roto i oku wheua te tawainga a oku hoa riri: i a ratou e mea mai nei ki a au i nga ra katoa, Kei hea tou Atua?
- 11
- He aha koe i piko iho ai, e toku wairua? he aha hoki koe i ohorere ai i roto i a au? tumanako atu ki te Atua: tera ano ahau e whakawhetai atu ki a ia, ko ia nei te ora o toku mata, me toku Atua.
Address: 
Phone: 
Email: