- 1
- (Ki te tino kai whakatangi Nehiroto. He himene na Rawiri.) Kia tahuri mai to taringa, e Ihowa, ki aku kupu, kia mohio mai koe ki taku whakaaroaronga.
- 2
- Whakarongo mai ki te reo o taku karanga, e toku Kingi, e toku Atua, he inoi atu hoki taku ki a koe.
- 3
- E rongo koe ki toku reo, e Ihowa, i te ata; i te ata ano ka whakatikaia atu e ahau taku inoi ki a koe, a ka titiro matatau atu.
- 4
- Ehara hoki koe i te Atua e pai ana ki te hara, e kore te kino e noho ki a koe.
- 5
- E kore te hunga wairangi e tu ki to aroaro: e kinongia ana e koe nga kai mahi katoa i te kino.
- 6
- E whakangaromia e koe te hunga korero teka; e whakarihariha ana a Ihowa ki te tangata toto, ki te tangata hianga.
- 7
- Ko au ia ka haere i runga i te tini o au atawhainga ki to whare: ka koropiko atu ahau ki te ritenga mai o to temepara tapu, me te wehi ano ki a koe.
- 8
- E Ihowa, arahina ahau i runga i to tika, he hoa riri hoki oku; whakatikaia to ara i mua i a au.
- 9
- Kahore hoki he pono i o ratou mangai; he kino kau a roto i a ratou; he urupa puare noa o ratou korokoro; e patipati ana o ratou arero.
- 10
- Whakangaromia ratou, e te Atua; kia hinga ratou i ā ratou whakaaro; peia atu ratou me a ratou tini mahi tutu; mo ratou i whakakeke ki a koe.
- 11
- Otiia kia hari katoa te hunga e whakawhirinaki atu ana ki a koe: kia hamama tonu ratou i te koa, mo ratou e hipokina iho nei e koe; kia whakamanamana ano hoki ki a koe te hunga e aroha ana ki to ingoa.
- 12
- No te mea ka manaakitia e koe, e Ihowa, te tangata tika; me he whakangungu rakau te manakohanga mai e karapotia ai ia e koe.
Address: 
Phone: 
Email: