Psalms Chapter 52 - Paipera Tapu 1868 | Te Paipera Tapu 1868

Psalms Chapter 52 - Paipera Tapu 1868

1
(Ki te tino kai whakatangi. He Makari; na Rawiri, i a Roeke Eromi i haere atu, i whakaatu ki a Haora, i mea ki a ia, Kua tae a Rawiri ki te whare o Ahimereke.) He aha koe ka whakapakari ai ki te kino, e te tangata nui? e pumau tonu ana te atawhai o te Atua.
2
E whakatakoto ana to arero i nga mea nanakia, e mahi hianga ana, ano he heu koi.
3
E arohaina rawatia ana e koe te kino i te pai, te teka i te korero tika. Hera.
4
E te arero hianga, e arohaina ana e koe nga kupu horomiti katoa.
5
Ka wawahi ano hoki te Atua i a koe ake tonu atu; ka tangohia atu koe e ia, ka takiritia atu i tou nohoanga, ka hutia atu hoki koe i te whenua o te ora. Hera.
6
E kite hoki te hunga tika, a ka wehi; ka kata hoki ki a ia.
7
Nene, te tangata kihai nei i waiho e ia te Atua hei kaha mona; heoi, whakawhirinaki ana ia ki te tini o ana taonga, whakapakari ana i runga i tana mahi kino.
8
Ko au ia e rite ana ki te oriwa matomato i roto i te whare o te Atua: ka whakawhirinaki ahau ki te mahi tohu a te Atua, ake ake ake.
9
Ka whakamoemiti tonu ahau ki a koe, nau hoki tenei i mea: ka tumanako atu ano ki tou ingoa; he mea pai hoki ki te aroaro o to hunga tapu.