- 1
- (Ki te tino kai whakatangi Ionata-eremerekokime. Na Rawiri. He Mikitama, i a ia ka mau i nga Pirihitini ki Kata.) Tohungia ahau e te Atua, ka horomia hoki ahau e te tangata: e tukino ana ia ki a au i tenei ra, i tenei ra, i a ia e ngangare tonu nei.
- 2
- E whai ana oku hoa riri i tenei ra, i tenei ra, kia horomia au; he tokomaha nei hoki, e te Runga-rawa, e whawhai mai ana ki a au.
- 3
- Ka whakawhirinaki atu ahau ki a koe i te wa e mataku ai ahau.
- 4
- Ka whakamoemiti au ki te Atua ki tana kupu: e whakawhirinaki atu ana ahau ki te Atua, e kore ahau e wehi ki ta te kikokiko e mea ai ki a au.
- 5
- E whakariroia ketia ana e ratou aku kupu i nga ra katoa; heoi ano ta ratou e whakaaro ai ko te kino moku.
- 6
- E huihui ana ratou, e piri ana: e titiro matatau ana ratou ki aku hikoinga, i a ratou e whanga nei kia patua ahau.
- 7
- Ma te hara koia ratou ka mawhiti ai? kia riri koe, e te Atua, whakatakā iho hoki nga iwi.
- 8
- E tāua ana e koe oku kopikopikotanga: rongoatia oku roimata ki roto ki to ipu: kahore ianei ena mea i to pukapuka?
- 9
- I te wa e tangi atu ai ahau ka whakahokia ki muri oku hoa riri: ka matau ahau ki tenei; no te mea kei a au te Atua.
- 10
- Ma te Atua ahau ka whakamoemiti ai ki tana kupu; ma Ihowa ahau ka whakamoemiti ai ki tana kupu.
- 11
- E whakawhirinaki atu ana ahau ki te Atua: e kore ahau e wehi ki ta te tangata e mea ai ki a au.
- 12
- Kei a au nga kupu taurangi ki a koe, e te Atua: me tuku atu e ahau nga whakamoemiti ki a koe.
- 13
- Nau hoki taku wairua i whakaora kei mate: e kore ianei koe e whakau i oku waewae kei paheke, kia haere ai ahau i te aroaro o te Atua i roto i te māramatanga o te hunga ora?
Address: 
Phone: 
Email: