- 1
- (Ki te tino kai whakatangi, ko Ara-takiti. He Mikitama. Na Rawiri, i tona rerenga i a Haora i a ia nei i roto i te ana.) Tohungia ahau, e te Atua, tohungia ahau, e whakawhirinaki ana hoki toku wairua ki a koe: ae, ka piri ahau ki raro ki te taumarumarutanga o ou pakau, kia pahemo ra ano enei mate.
- 2
- Ka karanga atu ahau ki te Atua o runga rawa, ki te Atua e oti ai aku mea katoa.
- 3
- Ka ungā mai e ia he kai whakaora moku i runga i te rangi; ka whakahēngia e ia te tangata e mea ana kia horomia ahau. Ka ungā mai e te Atua tana mahi tohu me tana pono.
- 4
- Kei waenganui toku wairua i nga raiona: e takoto ana ahau i waenganui i te hunga e whakakapura ana; i nga tama hoki a te tangata, he tao nei o ratou niho, he pere, a he hoari koi o ratou arero.
- 5
- Kia whakanuia koe, e te Atua, ki runga ake i nga rangi: hei runga atu i te whenua katoa tou kororia.
- 6
- Kua whakatakotoria e ratou he kupenga mo oku takahanga, kua piko iho toku wairua: kua keria e ratou he poka ki toku aroaro, a taka iho ko ratou ano ki roto. Hera.
- 7
- Pumau tonu toku ngakau, e te Atua, pumau tonu toku ngakau: ka waiata ahau, ka himene atu.
- 8
- E ara, e toku kororia; e ara, e te hatere me te hāpa: ka ara wawe ano ahau.
- 9
- Ka whakamoemiti ahau ki a koe, e te Ariki, i waenganui i te iwi; ka himene atu ki a koe i waenganui i nga tauiwi.
- 10
- E nui ana hoki tau mahi tohu, a tutuki noa ki nga rangi, me to pono a tutuki noa ki nga kapua.
- 11
- Kia whakanuia koe e te Atua, ki runga atu i nga rangi: hei runga atu i te whenua katoa tou kororia.
Address: 
Phone: 
Email: