Psalms Chapter 73 - Paipera Tapu 1868 | Te Paipera Tapu 1868

Psalms Chapter 73 - Paipera Tapu 1868

1
(He himene na Ahapa.) He pono e pai ana te Atua ki a Iharaira, te hunga ngakau ma.
2
Ko ahau ia, wahi iti kua tapepa oku waewae: me i kotahi kua paheke aku takahanga.
3
I hae hoki ahau ki te hunga kuare, i taku kitenga i te tangata hara e kake ana.
4
Kahore hoki he whakawiringa a te mate i a ratou: a e maro ana o ratou uaua.
5
Kahore nga mea whakapouri tangata e pa ki a ratou; kahore ano hoki ratou e whiua tahitia me te mano o te tangata.
6
No reira, anō he hei te whakakake e awhi nei i a ratou, anō he kakahu te tutu e hipokina nei ratou.
7
Pupuhi ana o ratou kanohi i te ngako: he nui rawa nga whakaaro a o ratou ngakau.
8
E whakahi ana ratou, e korero kino ana mo te whakatoi: kei runga noa ake a ratou korero.
9
Tutuki tonu o ratou mangai ki nga rangi: e kopikopiko ana hoki o ratou arero i runga i te whenua.
10
Koia tona iwi i hoki mai ai ki konei: a e whakawiria mai ana he wai mo ratou, kī tonu te kapa.
11
E mea ana ratou, Ma te aha e matau ai te Atua? he matauranga koia to te Runga-rawa?
12
Na, ko te hunga kino tenei, e kake nei i te ao, e hua nei o ratou taonga.
13
He pono he maumau taku whakamakanga i toku ngakau, taku horoinga hoki i oku ringaringa ki te hara-koretanga.
14
E whiua ana hoki ahau i te roa o te ra, e pakia ana i tenei ata, i tenei ata.
15
Ki te mea ahau, Ka penei taku korero, na, e tinihanga ana ahau ki te whakatupuranga o o tamariki.
16
I taku meatanga kia matauria tenei, ka kite ahau he mahi whakauaua.
17
Tae noa ahau ki te wahi tapu o te Atua, katahi au ka mohio ki to ratou mutunga iho.
18
He pono i whakaturia ratou e koe ki nga wahi pahekeheke; i whakatakā iho ratou e koe ki te whakangaromanga.
19
Ano te pānga whakareretanga o to ratou hunanga: kua tino pau rawa ratou i nga wehi.
20
Ka rite ki te rekanga kanohi, ina ara ake te tangata, tāu whakahaweatanga ki to ratou ahua, e te Ariki, ina ara ake koe.
21
Na, mamae noa iho toku ngakau, a hukihuki ana oku whatumanawa.
22
He whakaaro-kore hoki ahau, he kuare: me te mea he kirehe ahau i tou aroaro.
23
Ahakoa ra kei a koe tonu ahau; e puritia ana e koe toku ringaringa matau.
24
Ma to whakaaro ahau e arahi; muri iho ka riro ahau i a koe ki te kororia.
25
Ko wai hoki toku i te rangi aua koe? kahore atu hoki aku i te whenua e hiahia ai, ko koe anake.
26
Hemo iho oku kikokiko me toku ngakau: ko te Atua ia te kaha o toku ngakau, me toku wahi ake ake.
27
Na, te hunga e mamao atu ana i a koe ka mate ratou: ka whakangaromia e koe te hunga puremu katoa e whakarere nei i a koe.
28
Ko ahau ia he pai ano ki a au te whakatata ki te Atua: kua waiho e ahau te Ariki, a Ihowa, hei whakawhirinakitanga moku, ka whakapuakina ano e ahau au mahi katoa.