Psalms Chapter 76 - Paipera Tapu 1868 | Te Paipera Tapu 1868

Psalms Chapter 76 - Paipera Tapu 1868

1
(Ki te tino kai whakatangi Nekinoto. He himene, he waiata na Ahapa.) E matauria ana te Atua i roto i a Hura, e nui ana tona ingoa i roto i a Iharaira.
2
Kei Harama ano hoki tona tapenakara; kei Hiona ano tona nohoanga.
3
I whati ano i a ia i reira nga pere o te kopere, te whakangungu rakau, te hoari, me nga mea mo te whawhai. Hera.
4
Tera atu tou kororia, tou nui, i to nga maunga kirehe.
5
Kua pahuatia te hunga ngakau toa, moe ana ratou i ta ratou moe; kihai ano i whai ringaringa tetahi o nga marohirohi.
6
Na te whakatupehupehu, e te Atua o Hakopa, i parangia ai te hariata me te hoiho e te moe.
7
Ko koe, ina, ko koe te mea e wehingia; ko wai hoki e tu ki tou aroaro ina riri koe?
8
Nau i rangona iho ai te whakarite whakawa i te rangi: wehi ana te whenua, whakaririka kau ana,
9
I te aranga ake o te Atua ki te whakarite whakawa, ki te whakaora i te hunga mahaki katoa o te whenua. Hera.
10
He pono ka whai kororia koe i te riri a te tangata: a mau ano e pehi te toenga o te riri.
11
Whakapuakina mai te kupu taurangi ki a Ihowa, ki to koutou Atua, whakamanā hoki, e te hunga katoa i tetahi taha ona, i tetahi taha: mauria mai he hakari ki a ia, ka tika hoki te wehi ki a ia.
12
Mana e whawhati te wairua o nga rangatira: e matakuria ana ia e nga kingi o te whenua.