Psalms Chapter 77 - Paipera Tapu 1868 | Te Paipera Tapu 1868

Psalms Chapter 77 - Paipera Tapu 1868

1
(Ki te tino kai whakatangi, ki a Ierutunu. He himene na Ahapa.) I pa toku reo ki te Atua, i karanga ano toku reo ki te Atua, a tahuri mai ana tona taringa ki a au.
2
I rapu ahau ki te Ariki i te ra o taku pouritanga: maro tonu toku ringa i te po, kihai ano hoki i pepeke; kihai toku wairua i pai kia whakamarietia.
3
I mahara ahau ki te Atua, a i pouri: i whakaaroaro, a ngaro iho toku wairua. Hera.
4
E puritia ana e koe oku kanohi kia mataara tonu; e pouri ana ahau, tē ahei te korero.
5
Ka whakaaroa e ahau nga ra onamata, nga tau o tua iho.
6
E mahara ana ahau ki taku waiata i te po, e korerorero ana ki toku ngakau, a e rapurapu ana toku wairua.
7
Tera ranei te Ariki e panga tonu ake ake? a heoi ano ranei ana manakohanga mai?
8
Kua kahore ranei tana mahi tohu mo ake tonu atu? kua pahika ke ranei tana kupu, a, tera whakatupuranga, tera whakatupuranga.
9
Kua wareware ranei te Atua ki te atawhai? kua riri ranei ia, a tutakina atu ana e ia tona aroha?
10
Na, ka mea ahau, Ko taku ngoikoretanga tenei: otira ka mahara ahau ki nga tau o te ringaringa matau o te Runga-rawa.
11
Ka mahara ahau ki nga mahi a Ihowa; ae ra, ka mahara ahau ki au mea whakamiharo o tua iho.
12
Ka whakaaro hoki ahau ki au meatanga katoa, ka korerotia e ahau au mahi.
13
E te Atua, kei te wahi tapu tou ara: ko wai te Atua hei rite mo to tatou Atua te nui?
14
Ko koe te Atua e mahi nei i nga mea whakamiharo: kua whakapuakina e koe tou kaha i waenganui o nga iwi.
15
Hokona ana e tou ringaringa tou iwi, nga tamariki a Hakopa raua ko Hohepa.
16
I kite nga wai i a koe, e te Atua, i kite nga wai i a koe, mataku ana: i oho ano nga rire.
17
Ringitia mai ana he wai e nga kapua, puaki ana te haruru o nga rangi: rererere ana au pere.
18
I roto i te awhiowhio te haruru o to whatitiri: mārama noa te ao i nga uira; wiri ana te whenua, oioi ana.
19
I te moana tou ara, i nga wai nui ano hoki tou huarahi, e kore ano hoki e kitea ou takahanga.
20
He mea arahi e koe tou iwi, ano he kahui na te ringaringa o Mohi raua ko Arona.