- 1
- (Ki te tino kai whakatangi Hohanimi-Erutu. He himene na Ahapa.) Tahuri mai tou taringa, e te Hepara o Iharaira, e arahi nei i a Hohepa, ano he kahui hipi, e noho mai nei i waenganui i nga kerupima; whiti mai.
- 2
- Whakaohokia tou kaha i te aroaro o Eperaima, o Peniamini, o Manahe: a haere mai ki te whakaora i a matou.
- 3
- Whakahokia ake matou, e te Atua: kia mārama mai tou mata, a ka ora matou.
- 4
- E Ihowa, e te Atua o nga mano, kia pehea ake te roa o tau riri ki te inoi a tou iwi?
- 5
- E whangainga mai ana e koe he roimata hei taro ma ratou, he nui hoki te mehua roimata e homai nei e koe kia inumia e ratou.
- 6
- Kua meinga nei matou hei totohetanga ma o matou hoa, a e kataina ana matou e o matou hoa riri.
- 7
- Whakahokia ake matou, e te Atua o nga mano; kia mārama mai hoki tou mata, a ka ora matou.
- 8
- I maua mai e koe he waina i Ihipa: ka oti i a koe nga tauiwi te panga, na, whakatokia iho e koe.
- 9
- I whakapaia e koe he tūnga mona, i mea ano kia hou ona pakiaka, a ka kapi te whenua.
- 10
- Taumarumaru ana tona ata ki runga ki nga pukepuke, ona manga ki nga hita nunui.
- 11
- I tautotoro atu ona manga ki te moana, ona rārā ki te awa.
- 12
- He aha koe i pakarukaru ai i ona taiepa, i kowhakiwhakia ai ia e nga tangata katoa e tika ana i te ara?
- 13
- Mongamonga noa i te poaka toa o te ngahere, e kainga ana e te kirehe mohoao o te parae.
- 14
- Hoki mai ra, e te Atua o nga mano: titiro iho i te rangi, kia kite mai koe, haereere mai hoki ki tenei waina;
- 15
- Ki te rakau i whakatokia e tou ringa matau, ki te manga hoki i whakakahangia e koe mau.
- 16
- Kua pau i te ahi, kua poutokia; ngaro iho ratou i te riri o tou mata.
- 17
- Waiho tou ringa i runga i te tangata o tou ringa matau, i te tama a te tangata i whakakahangia e koe mau.
- 18
- Penei e kore matou e hoki atu i a koe: whakahauorangia matou, a ka karanga atu matou ki tou ingoa.
- 19
- Whakahokia ake matou, e Ihowa, e te Atua o nga mano; kia mārama mai tou mata, a ka ora matou.
Address: 
Phone: 
Email: