Psalms Chapter 89 - Paipera Tapu 1868 | Te Paipera Tapu 1868

Psalms Chapter 89 - Paipera Tapu 1868

1
(He Makiri na Etana Eterahi.) Ka waiatatia e ahau nga mahi tohu a Ihowa ake ake: ka whakapuakina e toku mangai tou pono ki nga whakatupuranga katoa.
2
I mea hoki ahau, Ka whakaturia ake te mahi tohu mo amua tonu atu: ka whakapumautia e koe tou pono ki nga tino rangi.
3
Kua whakarite kawenata ahau ki taku i whiriwhiri ai: kua oati ki taku pononga, ki a Rawiri.
4
Ka whakapumautia e ahau ou uri ake ake: ka hangā ake tou torona, a, tena whakatupuranga, tena whakatupuranga. Hera.
5
Ka whakamoemiti ano hoki nga rangi, e Ihowa, ki au mahi whakamiharo; ki tou pono hoki i roto i te whakaminenga o te hunga tapu.
6
Ko wai hoki i nga rangi hei rite mo Ihowa? ko wai i roto i nga tamariki a te hunga nunui e rite ana ki a Ihowa?
7
E tika ana kia nui te wehi ki te Atua i roto i te whakaminenga o te hunga tapu: kia hopohopo hoki ki a ia te hunga katoa i tetahi taha ona, i tetahi taha.
8
E Ihowa, e te Atua o nga mano, kei hea he Ihowa hei rite mou te kaha? hei rite ranei mo tou pono i tetahi taha ou, i tetahi taha?
9
Ko koe te kingi o te huamo o te moana: ka oho ona ngaru, ko koe hei whakamarino.
10
Mongamonga noa i a koe a Rahapa, ano he tangata i patua: kua whakamararatia e koe ou hoa riri ki to ringa kaha.
11
Nou nga rangi, nou ano hoki te whenua: te ao me nga mea e hua ana i runga, nau ena i whakapumau.
12
Te nota me te tonga nau ena i hanga: ka hari a Taporo raua ko Heremona ki tou ingoa.
13
He tākakau marohirohi tou: e kaha ana tou ringa, kei runga tonu tou matau.
14
Ko te tika me te whakarite whakawa te turanga o tou torona: e haere te mahi tohu me te pono i mua i tou aroaro.
15
Ka hari te iwi e mohio ana ki te tangi whakahari: e haere ratou, e Ihowa, i te māramatanga o tou mata.
16
E hari ratou ki tou ingoa i te roa o te ra: a ma tou tika ka kake ai ratou.
17
Ko koe hoki te kororia o to ratou kaha: ma to manakohanga mai ano ka ara ai to matou haona.
18
Ko Ihowa hoki to matou whakangungu rakau: a hei kingi mo tatou te Mea Tapu o Iharaira.
19
I korero moemoea mai koe i reira ki to Mea Tapu, i mea: Kua hoatu e ahau he kaha ki runga ki tetahi tangata marohirohi; kua whakanuia e ahau tetahi i whiriwhiria i roto i te iwi.
20
Kua kitea e ahau taku pononga a Rawiri: kua whakawahia ia e ahau ki taku hinu tapu:
21
Ka u atu toku ringa hei awhina mona: ma toku tākakau ano hoki ia e whakakaha.
22
E kore te hoa riri e whai wahi ki a ia: e kore ano hoki te tama a te kino e tukino i a ia.
23
Maku ano hoki e tukituki ona hoa riri ki tona aroaro: ka whiua ano e ahau te hunga e kino ana ki a ia.
24
Otira ka mau ki a ia taku pono me taku mahi tohu: a ma toku ingoa ka ara ai tona haona.
25
Maku tona ringaringa ka pa atu ai ki te moana: tona matau ki nga awa.
26
Ka karanga mai ia ki a au, Ko koe toku Pāpā, toku Atua, te kohatu o toku whakaoranga.
27
Ka waiho ano hoki ia hei matamua maku ki runga ake i nga kingi o te whenua.
28
Ka rongoatia ake e ahau taku mahi tohu mona ake tonu atu: ka mau tonu ano taku kawenata ki a ia.
29
Ka whakatupuria e ahau ona uri ake tonu atu, a ka rite tona torona ki nga ra o te rangi.
30
Ki te mea ka whakarerea e ana tamariki taku ture, a kahore e haere i aku whakariteritenga;
31
Ki te takahi ratou i aku tikanga; a kahore e pupuri i aku whakahaunga;
32
Katahi ka whaia to ratou mahi tutu e taku rakau, ā ratou kino e nga whiu.
33
Ahakoa ra e kore e whakamutua taku aroha ki a ia, e kore ano hoki taku pono e he.
34
E kore taku kawenata e takahia e ahau, e kore ano hoki e whakaputaia ketia te mea i puta atu i oku ngutu.
35
Kotahi aku oatitanga i toku tapu, E kore ahau e teka ki a Rawiri.
36
Ka mau tonu tona uri ake ake; a e rite tona torona ki te ra i toku aroaro.
37
E rite tona pumautanga ki to te marama ake ake: hei kai whakaatu pono ano hoki i runga i te rangi. Hera.
38
Na kua panga nei koe, kua whakarihariha, kua riri ki tau i whakawahi ai.
39
Kua whakakahoretia e koe te kawenata o to pononga: noa iho i a koe tona karauna; kua whakatakā hoki ki te whenua.
40
Kua whakahoroa katoatia e koe ana taiepa: kua meinga kia pakarukarua ona pa kaha.
41
E pahua ana i a ia nga tangata katoa e tika ana i te ara: he tawainga ia na ona hoa tata.
42
Kua ara i a koe te ringaringa matau o ona hoa whawhai: kua meinga e koe kia hari ona hoa whawhai katoa.
43
Ngore noa i a koe te mata o tana hoari: kihai ano hoki koe i tautoko i a ia ki te tatauranga.
44
Kua whakamutua e koe tona kororia: kua pangā nei e koe tona torona ki raro ki te whenua.
45
Kua whakaporoa e koe nga ra o tona taitamarikitanga: kua hipokina ia e koe ki te whakama. Hera.
46
Kia pehea te roa, e Ihowa? ka whakangarongaro atu ranei koe, ake tonu atu! ka toro ranei tau riri, ano he ahi?
47
Kia mahara ki a au he mea memeha noa: he aha i hangā ai e koe nga tangata katoa hei kore noa iho?
48
Ko wai tena tangata e ora nei, a e kore e kite i te mate? e mawhiti koia i a ia tona wairua i te kaha o te rua tupapaku. Hera.
49
E te Ariki, kei hea o arohatanga o mua i oatitia e koe ki a Rawiri i runga i tou pono?
50
Maharatia ra, e te Ariki, te tawainga ki o pononga, ki a au e mau nei i roto i toku uma te tawai a te hunga nunui katoa:
51
Ara, te tawai a ou hoa riri, e Ihowa, e tawai nei ki nga hikoinga o to tangata i whakawahi ai.
52
Kia whakapaingia a Ihowa ake ake. Amine, ae Amine.