Psalms Chapter 98 - Paipera Tapu 1868 | Te Paipera Tapu 1868

Psalms Chapter 98 - Paipera Tapu 1868

1
(He himene.) Waiatatia ki a Ihowa he waiata hou; he mahi whakamiharo hoki ana: na tona ringa matau, na tona ringa tapu, i taea ai e ia te whakaora.
2
Kua whakakitea mai e Ihowa tana whakaoranga, kua whakapuakina e ia tona tika ki te aroaro a nga tauiwi.
3
Kua mahara ia ki tana mahi tohu me tana pono ki te whare o Iharaira; a kua kite nga pito katoa o te whenua i te whakaoranga a to tatou Atua.
4
Kia hari te hamama, e te whenua katoa, ki a Ihowa: hamama, kia hari, himene atu.
5
Himene atu ki a Ihowa i runga i te hāpa, i runga i te hāpa, me te himene ano te reo.
6
I runga i nga tētere, i te tangi ano a te koronete: kia hari te hamama ki te aroaro o Ihowa, o te Kingi.
7
Kia haruru te moana, me nga mea e hua ana i roto, te ao, me ona tangata e noho ana i runga.
8
Kia papaki nga ringaringa o nga roma, kia hari tahi nga pukepuke ki te aroaro o Ihowa: e haere mai ana hoki ia ki te whakarite whakawa mo te whenua.
9
Ka whakariterite ia mo te ao i runga i te tika: mo nga iwi hoki i runga i te pono.