Revelation Chapter 1 - Paipera Tapu 1868 | Te Paipera Tapu 1868

Revelation Chapter 1 - Paipera Tapu 1868

1
Ko te whakakitenga a Ihu Karaiti, homai e te Atua ki a ia, kia whakakitea ai e ia ki ana pononga nga mea meake nei rite; na, whakaaturia mai ana e ia, he mea mea na tana anahera, i tonoa mai e ia ki tana pononga ki a Hoani:
2
Ki te kai whakaatu i te kupu a te Atua, i te whakaaturanga hoki o Ihu Karaiti, i tana hoki kite ai.
3
Ka hari te tangata e titiro ana i te pukapuka, me te hunga ano hoki e whakarongo ana ki nga kupu o te poropititanga, a e pupuri ana i nga mea kua oti te tuhituhi ki reira: kua tata hoki te taima.
4
Na Hoani ki nga hahi e whitu i Ahia: Kia tau ki a koutou te aroha noa, me te rangimarie, he mea na Tenei e ora nei inaianei, i mua ano ia, a kei te haere mai ano; he mea ano na nga Wairua e whitu i mua i tona torona;
5
He mea ano na Ihu Karaiti, na te kai whakaatu pono, ko ia nei te putanga matamua o te hunga mate, me te rangatira o nga kingi o te whenua. I arohaina nei tatou e ia, i horoia ano hoki o tatou hara ki ona toto,
6
A meinga ana tatou e ia hei kingi hei tohunga ki te Atua, ara ki tona Matua; waiho atu i a ia te kororia me te kaha, ake tonu atu. Amine.
7
Tenei ia te haere mai nei me nga kapua, a e kite i a ia nga kanohi katoa, me te hunga hoki i wero i a ia: ka aue ano hoki nga hapu katoa o te whenua ki a ia. Ae, Amine.
8
Ko ahau te Arepa me te Omeka, te timatanga me te whakamutunga, e ai ta te Ariki, e ora nei inaianei, i mua ano ia, a kei te haere mai ano, ko te Kaha rawa nei ia.
9
Ko ahau tenei ko Hoani, ko to koutou tuakana, kua uru tahi nei ki te tukinotanga, ki te rangatiratanga ano hoki me te manawanui o Ihu Karaiti, i te motu ahau e karangatia nei ko Patamo, he mea hoki mo te kupu a te Atua, mo te whakaaturanga hoki o Ihu Karaiti.
10
I te Wairua ahau i te ra o te Ariki, a ka rongo ahau i te reo nui i muri i a au, me te mea no te tētere,
11
E mea ana, Ko ahau te Arepa me te Omeka, ko te tuatahi me te whakamutunga. Tuhituhia ki te pukapuka tāu e kite nei, tukua atu hoki ki nga hahi e whitu i Ahia; ki Epeha, ki Hamurana, ki Perekamu, ki Taiataira, ki Harariha, ki Pirarerepia, ki Raorikia.
12
Na, toku tahuritanga ake kia kite i te reo i korero nei ki ahau. Tahuri rawa ake, ka kite ahau i nga turanga rama koura e whitu;
13
A i waengapu o nga turanga rama e whitu ko tetahi e rite ana ki te Tama a te tangata, tatū noa ki nga waewae tona kakahu, he mea whitiki hoki te uma ki te whitiki koura;
14
Ko tona mātenga me nga makawe he ma, anō he huruhuru ma no te hipi, anō he hukarere; ko ona kanohi, anō he mura ahi;
15
Ona waewae ano hoki rite tonu ki te parahi pai, anō e ka ana i roto i te oumu; tona reo, ano ko te haruru o nga wai maha.
16
E whitu ano nga whetu i tona ringaringa matau: i puta atu ano hoki he hoari i roto i tona mangai, he mea e rua nei ona mata, he mea koi: tona kanohi hoki, ano ko te ra ina kaha te whiti mai.
17
A, toku kitenga i a ia, hinga ana ahau ki ona waewae, anō he tangata kua mate. Na, ka whakapangia mai e ia tona ringaringa matau ki a au, ka mea mai ki a au, Kaua e mataku; ko ahau te tuatahi me te whakamutunga:
18
Ko ahau ano tenei e ora nei, i mate ano hoki ahau i mua; na, kei te ora tenei ahau, a ake tonu atu, Amine; kei a au ano nga ki o te po raua ko te mate.
19
Tuhituhia nga mea kua kite nei koe, nga mea onaianei nei, me nga mea meake nei puta i muri iho i enei mea;
20
Te mea ngaro nei, nga whetu e whitu i kitea e koe i taku ringa matau, me nga turanga rama koura e whitu. Nga whetu e whitu ko nga anahera o nga hahi e whitu: a nga turanga rama e whitu i kite na koe, ko nga hahi e whitu.