Revelation Chapter 10 - Paipera Tapu 1868 | Te Paipera Tapu 1868

Revelation Chapter 10 - Paipera Tapu 1868

1
A ka kite ahau i tetahi atu anahera kaha e heke iho ana i te rangi, he kapua nei te kakahu: he aniwaniwa ano i runga i tona mātenga, tona kanohi rite tonu ki te ra, ona waewae rite tonu ki te pou kapura:
2
Kei tona ringaringa ano hoki tetahi pukapuka nohinohi e tuwhera ana: a e takahi ana tona waewae matau ki te moana, tona maui ki te whenua,
3
He nui ano tona reo ki te karanga, ano he raiona e tangi ana: a ka karanga ia, ka puaki nga reo o nga whatitiri e whitu.
4
Ano ka puaki nga reo o nga whatitiri e whitu, ka mea ahau ki te tuhituhi: na, ka rangona e ahau he reo i te rangi e mea mai ana ki a au, Hiritia nga mea kua whakapuakina nei e nga whatitiri e whitu, kaua hoki enei e tuhituhia.
5
Na, te anahera i kitea e ahau e tu ana i runga i te moana, i runga ano i te whenua, kokiritia atu ana e ia tona ringaringa ki te rangi,
6
A oatitia ana e ia te Mea ora tonu ake ake ake, nāna nei i hanga te rangi me ona mea, te whenua me ona mea, te moana me ona mea, i mea ia, Na, kahore ake he taima:
7
Otira i nga ra o te reo o te whitu o nga anahera, ina mea ia ki te whakatangi, ka whakaotia te mea ngaro a te Atua, tana i kauwhau ai ki ana pononga ki nga poropiti.
8
A ka korero ano ki a au te reo i rongo ai ahau i te rangi, ka mea, Tikina atu te pukapuka nohinohi e tuwhera na, i te ringaringa o te anahera e tu na i runga i te moana i runga ano i te whenua.
9
Na ka haere ahau ki te anahera, ka mea ki a ia, Homai ki a au te pukapuka nohinohi na. Ka mea mai ia ki a au, Tangohia kainga; a ka kawa tou kopu, ka reka ia ki tou mangai, ano he honi.
10
Na, ka tango ahau i te pukapuka nohinohi i te ringaringa o te anahera, kainga ana e ahau; a i reka ano ki toku mangai, ano he honi: kainga iho e au, kua kawa toku kopu.
11
A ka mea mai ano ia ki a au, Me poropiti ano koe ki nga huihuinga tokomaha o nga tāngata, ki nga iwi, ki nga reo, ki nga kingi.