- 1
- Na, ka kitea he tohu nui i te rangi; he wahine ko te ra tona kakahu, ko te marama kei raro i ona waewae, a i runga i tona mātenga ko nga whetu kotahi tekau ma rua hei karauna:
- 2
- Kua hapū hoki ia na karanga ana, oke ana, he mamae whanautanga.
- 3
- A, ka kitea tetahi atu tohu i te rangi, na, he tarakona nui he mea whero, e whitu ona mahunga, tekau ona haona, a e whitu ano nga karauna i runga i ona mahunga.
- 4
- A e kumea ana e tona hiku te wahi tuatoru o nga whetu o te rangi, makā ana e ia ki te whenua: a ka tu te tarakona i te aroaro o te wahine i mea nei ki te whanau, hei kai mo tana tamaiti ina whanau.
- 5
- Na, ka whanau he tamaiti tāne, māna nei e whakahaere tikanga mo nga iwi katoa ki te tokotoko rino: na, kua kahakina atu tana tamaiti ki te Atua, ki tona torona hoki.
- 6
- A ka oma te wahine ki te koraha, kua rite noa ake hoki he kāinga mona ki reira i te Atua, ki reira whangainga ai ia, kia taka ra ano nga ra kotahi mano e rua rau e ono tekau.
- 7
- Na, he whawhai tera kei te rangi: ko Mikaera ratou ko ana anahera e whawhai ana ki te tarakona; whawhai ana hoki te tarakona ratou ko ana anahera.
- 8
- A kihai ratou i toa; kihai ano hoki to ratou wahi i kitea i te rangi i muri iho.
- 9
- Na, ka makā te tarakona nui, te nakahi onamata, e karangatia nei ko te Rewera, ko Hatana hoki, e whakapohehe nei i te ao katoa: ka makā ia ki te whenua, ko ia ratou tahi ko ana anahera i makā atu.
- 10
- A ka rongo ahau i te reo nui i te rangi e ki ana, Tenei kua tae mai te whakaoranga, te kaha, me te rangatiratanga o to tatou Atua, me te mana hoki o tana Karaiti: no te mea kua whakatakā te kai whakapa hē ki o tatou teina, e whakapa hē nei ki a ratou i te ao i te po i te aroaro o to tatou Atua.
- 11
- Hinga ana ia i a ratou, he meatanga hoki na nga toto o te Reme, na te kupu hoki o to ratou whakaaturanga: kihai ratou i aroha ki te ora mo ratou, a mate noa.
- 12
- Kia hari koutou ki tenei, e nga rangi, e te hunga hoki e noho ana i reira. Aue te mate mo te hunga e noho ana i te whenua i te moana hoki! kua heke atu hoki ki a koutou te rewera, nui atu hoki tona riri, no te mea kua mātau hoki ia he poto tana taima.
- 13
- Ano ka kite te tarakona kua makā ia ki te whenua, ka whakatoia e ia te wahine nāna te tamaiti tāne i whanau nei.
- 14
- Na, e rua nga pakau o tetahi ekara nui kua hoatu ki te wahine, kia rere ai ia ki te koraha, ki tona kāinga, ki reira whangainga ai a taka noa he taima, etahi taima, me te hawhe taima, kei kitea mai e te nakahi.
- 15
- Na, ka ruakina mai he wai, ano he awa, e te nakahi i tona mangai i muri i te wahine, kia kahakina atu ai ia e te awa.
- 16
- A ka awhinatia mai te wahine e te whenua, ka hamama te mangai o te whenua, inumia ake te awa i ruakina mai nei e te tarakona i roto i tona mangai.
- 17
- Heoi riri ana te tarakona ki te wahine; haere ana ia ki te whawhai ki era atu o tona whanau, ki te hunga e pupuri ana i nga ture a te Atua, kei a ratou nei te whakaaturanga o Ihu Karaiti.
Address: 
Phone: 
Email: