- 1
- A ka rongo ahau i te reo nui he mea no roto i te whare tapu, e mea ana ki nga anahera e whitu. Haere koutou, ringihia nga oko o te riri a te Atua ki te whenua.
- 2
- Na, haere ana te tuatahi, ringihia ana e ia tana oko ki te whenua; a kua pa he mariao kino whakarihariha ki nga tāngata kei a ratou nei te tohu a te kararehe, ki te hunga hoki e koropiko ana ki tona whakapakoko.
- 3
- Na, ka ringihia e te tuarua o nga anahera tana oko ki te moana; a ka meinga hei toto, ano no te tupapaku: a ka mate nga wairua ora katoa i roto i te moana.
- 4
- Na, ka ringihia e te tuatoru o nga anahera tana oko ki nga awa ki nga puna wai; a ka meinga hei toto.
- 5
- I rongo ano ahau i te anahera o nga wai e mea ana, Tika tonu koe, e te Ariki, tenei koe inaianei, i mua ano koe, a ko te Mea Tapu koe, nau hoki enei whakarite whakawa.
- 6
- I ringihia hoki e ratou nga toto o te hunga tapu o nga poropiti, a hoatu ana e koe he toto ki a ratou kia inumia; he mea tika hoki ma ratou.
- 7
- I rongo ano ahau i tetahi atu i roto i te āta e mea ana, Ae ra, e te Ariki te Atua Kaha rawa, pono tonu tika tonu āu whakaritenga whakawa.
- 8
- Na, ka ringihia e te tuawha o nga anahera tana oko ki te ra; a ka hoatu ki a ia kia tunua nga tāngata ki te ahi.
- 9
- Na, he nui te tununga i tunua ai nga tāngata, a kohukohua ana e ratou te ingoa o te Atua, kei a ia nei te tikanga mo enei whiu: kihai hoki ratou i ripeneta i hoatu i te kororia ki a ia.
- 10
- Na, ka ringihia e te tuarima o nga anahera tana oko ki te torona o te kararehe; a ka whakapouritia tana rangatiratanga; a ngaua ana e nga tāngata o ratou arero i te mamae,
- 11
- Kohukohua ana hoki e ratou te Atua o te rangi mo o ratou mamae mo o ratou mariao, kihai ano ratou i ripeneta ki a ratou mahi.
- 12
- Na, ka ringihia e te tuaono o nga anahera tana oko ki te awa nui ki Uparati; a mimiti ake tona wai, he mea kia rite ai te huarahi o nga kingi o te rawhiti.
- 13
- A i kite ano ahau i nga wairua poke e toru, te rite kei te poroka, e puta mai ana i te mangai o te tarakona, i te mangai hoki o te kararehe, i te mangai ano hoki o te poropiti teka.
- 14
- Ko nga wairua hoki ratou o nga rewera, e mahi ana i nga tohu, e haere atu ana ki nga kingi a te whenua o te ao katoa hoki, ki te huihui i a ratou ki te whawhai i taua ra nui o te Atua Kaha rawa.
- 15
- Nana, ka haere atu ahau, anō he tahae. Ka hari te tangata e mataara ana, e tiaki ana i ona kakahu, kei haere tahanga ia, kei kitea tona whakama.
- 16
- Na, ka huihuia ratou e ia ki tetahi wahi e karangatia nei i te reo Hiperu ko Aramakerona.
- 17
- Na, ka ringihia e te anahera tuawhitu tana oko ki te takiwa o te rangi: a ka puta mai he reo nui i te whare tapu o te rangi, i te torona, e mea ana, Kua mutu.
- 18
- A ka puta he reo, he whatitiri, he uira, me te ru nui; kahore he ru i pena te nui no te oroko nohoanga ra ano o nga tāngata ki te whenua.
- 19
- Na, ka wehea te pa nui e toru nga wahi, a ka horo nga pa o nga tauiwi: a ka maharatia Papurona nui i te aroaro o te Atua, hoatu ana ki a ia te kapa o te waina o te aritarita o tana riri.
- 20
- A oma ana nga motu katoa, kihai ano i kitea nga maunga.
- 21
- I heke iho ano hoki he whatu nui i nga tāngata i te rangi, kei to te taranata te taimaha: a kohukohua ana te Atua e nga tāngata, mo te whiu a te whatu; he nui rawa hoki tana whiu.
Address: 
Phone: 
Email: