- 1
- A muri iho i enei mea ka kite ahau i tetahi atu anahera e heke iho ana i te rangi, he mana nui tona; mārama tonu hoki te ao i tona kororia.
- 2
- He nui ano tona reo he kaha tana karanga, i mea ia, Kua horo, kua horo a Papurona nui, kua meinga hei kāinga rewera, hei whare herehere hoki mo nga wairua poke katoa, hei whare herehere mo nga manu poke katoa mo nga manu whakarihariha.
- 3
- Kua inu hoki nga tauiwi katoa i te waina o te riri o tana puremu, i puremu hoki nga kingi o te whenua ki a ia, kua whai taonga hoki nga kai hoko o te ao i te nui o ana mea papai.
- 4
- I rongo ano ahau i tetahi atu reo i te rangi, e mea ana, Puta mai koutou i roto i a ia, e toku iwi, kei uru tahi koutou ki ona hara, kei pāngia koutou e ona whiu.
- 5
- Kua tutuki hoki ana hara ki te rangi, a kua mahara te Atua ki ana mahi hē.
- 6
- Hoatu ki a ia tana i hoatu ai ki a koutou, takiruatia nga mea mona kia rite ki ana mahi: te kapa i whakakiia e ia kia rua a koutou whakakinga mona.
- 7
- Na, i whakanui ia i a ia, i torere ki ana mea whakaahuareka, kia pera ano te mamae me te pouri e hoatu e koutou ki a ia: e mea ana hoki ia i tona ngakau, E noho ana ahau hei kuini, ehara hoki ahau i te pouaru, e kore ano hoki ahau e kite i te pouri.
- 8
- Mo konei ano ka tae mai ona whiu i te ra kotahi, te mate, te pouri, te mate kai; a ka tahuna ia ki te ahi: e kaha ana hoki te Ariki te Atua e whakawa nei i a ia.
- 9
- A e tangi ki a ia e aue ki a ia nga kingi o te ao i puremu nei ki a ia, i torere ngatahi nei ki nga mea whakaahuareka, ina kite ratou i te paoa o tona tahunga;
- 10
- Ka tu mai ratou i tawhiti i te wehi ki tona whakamamaetanga, ka mea, Aue, aue, te pa nui a Papurona, te pa kaha! kua tae mai hoki tou whakawakanga i te haora kotahi.
- 11
- Ka tangi ano hoki nga kai hoko o te whenua ka aue ki a ia; no te mea kahore atu he tangata hei hoko i ta ratou utanga mai:
- 12
- I te utanga mai o te koura, o te hiriwa, o te kohatu utu nui, o te peara, o te rinena pai, o te papura, o te hirika, o te kahu whero, me nga rakau taina katoa, me nga tini oko rei, me nga tini oko rakau utu nui whakaharahara, oko parahi, rino, mapara,
- 13
- Me te hinamona, me nga mea kakara, me te hinu kakara, me te parakihe, me te waina, me te hinu, me te paraoa pai, me te witi, me nga kararehe, me nga hipi, me nga hoiho, me nga hariata, me nga pononga, me nga wairua tāngata.
- 14
- Heoi kua mahue koe i nga hua i hiahiatia e tou ngakau, kua mahue hoki koe i nga mea ngako katoa i nga mea papai, heoi ano kitenga o aua mea e koe.
- 15
- Nga kai hoko o enei mea, kua whai taonga nei i a ia, tu ana ratou i tawhiti i te wehi ki tona whakamamaetanga, me te tangi me te aue ano ratou,
- 16
- Me te ki ano ratou, Aue, aue, te pa nui, i kakahuria ki te rinena pai, ki te papura, ki te whero, i whakapaia ki te koura, ki te kohatu utu nui, ki nga peara!
- 17
- Kotahi tonu hoki te haora a moti rawa iho taua taonga nui. Na, nga rangatira kaipuke katoa, me te hunga katoa e huihui ana ki runga ki nga kaipuke, me nga kai whakatere kaipuke, me te hunga katoa kei te moana a ratou mahi, tu mai ana ratou i tawhiti,
- 18
- Me te karanga ano ratou i to ratou kitenga i te paoa o tona tahunga, me te ki ano ratou, Ko tehea pa i rite ki tenei pa nui?
- 19
- Opehia ana hoki e ratou he oneone ki o ratou mahunga, kei te karanga ratou, he tangi, he aue, kei te mea, Aue, aue, te pa nui, i whai taonga ai i ona utu nui te hunga katoa he kaipuke a ratou i te moana! kotahi tonu nei hoki te haora a moti rawa iho.
- 20
- Kia hari ki a ia, e te rangi, e nga apotoro tapu ano hoki, e nga poropiti; kua whakaritea nei hoki e te Atua ta koutou whakawa i a ia.
- 21
- Katahi ka hapainga ake e tetahi anahera kaha he kamaka i rite nei ki tetahi kamaka rahi no te mira, a makā ana e ia ki te moana, me te ki ano ia, Ka peneitia a Papurona te pa nui, ka makā whakareretia atu, e kore ano hoki e kitea i muri nei.
- 22
- Na, heoi ano rongonga i roto i a koe ki te reo o nga kai whakatangi hāpa, o nga kai whakatakoto rangi waiata, o nga kai whakatangi i nga putorino, i nga tētere; e kore ano hoki e kitea i nga wa i muri nei tetahi kai mahi o nga tini mahi i roto i a koe; e kore ano hoki e rangona i nga wa i muri nei te haruru o te kohatu mira i roto i a koe;
- 23
- E kore ano hoki e kitea i nga wa i muri nei te māramatanga o te rama i roto i a koe; e kore ano hoki e rangona i nga wa i muri nei te reo o te tāne marena hou, o te wahine marena hou, i roto i a koe: o kai hokohoko hoki, ko nga tāngata nunui o te ao; na o mahi makutu ano hoki i whakapohehetia ai nga iwi katoa.
- 24
- Kitea ana hoki i roto i a ia nga toto o nga poropiti, o te hunga tapu, o te hunga katoa hoki i whakamatea ki runga ki te whenua.
Address: 
Phone: 
Email: