- 1
- Na, muri iho i enei mea ka rangona e ahau he reo nui me te mea no te mano tini i te rangi, e mea ana, Areruia; Te whakaoranga, te kororia, te honore, te kaha, kei te Ariki kei to tatou Atua:
- 2
- He pono hoki he tika ana whakaritenga whakawa: kua whakaritea hoki e ia te whakawa mo te wahine puremu, te mea nui, i hē ai te whenua i tana puremu, kua rapua ano e ia he utu i a ia mo nga toto o ana pononga.
- 3
- Na, ka tuaruatia ano a ratou meatanga, Areruia. Heoi kake ake ana te paoa o taua pa, ake ake ake.
- 4
- A takoto ana nga kaumatua e rua tekau ma wha me nga mea ora e wha, koropiko ana ki te Atua e noho ana i runga i te torona, mea ana, Amine; Areruia.
- 5
- A ka puta mai he reo i te torona, e mea ana, Whakamoemiti atu ki to tatou Atua, e ana pononga katoa, e te hunga hoki e wehi ana i a ia, e te hunga iti, e te hunga nunui.
- 6
- Na, ka rangona ano he reo e ahau me te mea no te mano tini, me te mea he haruru no nga wai maha, me te mea he haruru no nga whatitiri kaha, e mea ana, Areruia: ka kingi hoki te Ariki te Atua Kaha rawa.
- 7
- Kia hari tatou kia koa, kia hoatu he kororia ki a ia: kua taea hoki te marenatanga o te Reme, kua oti ano te whakapai a tana wahine i a ia ano.
- 8
- A i tukua ki a ia kia whakakakahuria ki te rinena ma, ki te rinena kanapa: na, te rinena ra, ko te tika a te hunga tapu.
- 9
- I mea mai ano ia ki a au, Tuhituhia, Ka hari te hunga kua karangatia ki te hapa o te marenatanga o te Reme. Ka mea mai ano ia ki a au, Ko nga kupu pono enei a te Atua.
- 10
- Na, ka takoto ahau ki mua i ana waewae, ka mea kia koropiko ki a ia. A, ka mea mai ia ki a au, Kauaka: ko tou hoa pononga ano ahau, no ou tuakana hoki kei a ratou nei te whakaaturanga o Ihu: me koropiko ki te Atua: ko te whakaaturanga hoki i a Ihu ta te wairua o te poropititanga.
- 11
- A ka kite ahau i te rangi e tuwhera ana, na, he hoiho ma; a, te ingoa o tona kai noho ko te Pono ko te Tika, kei runga i te tika tana whakarite whakawa tana whawhai.
- 12
- Ona kanohi, ano he mura ahi, i runga ano i tona mātenga nga karauna maha; he ingoa tona kua oti te tuhituhi, e kore nei tetahi e mātau, ko ia anake.
- 13
- Te kakahu i kakahuria e ia he mea tuku ki te toto: te ingoa i karangatia ai ia, Ko te Kupu a te Atua.
- 14
- E haere ana hoki i muri i a ia nga taua, era i te rangi, o ratou hoiho ano he ma, he mea whakakakahu ano ratou ki te rinena ma, ki te mea paru kore.
- 15
- E puta mai ana hoki i roto i tona mangai he hoari koi, hei patu māna i nga tauiwi: he rino ano hoki te tokotoko e tohutohu ai ia i a ratou: e takahi ana hoki ia i te takahanga waina o te aritarita o te riri o te Atua Kaha rawa.
- 16
- He ingoa ano tona tuhituhi rawa ki tona kakahu ki tona huha, KO TE KINGI O NGA KINGI, KO TE ARIKI O NGA ARIKI.
- 17
- I kite ano ahau i tetahi anahera e tu ana i te ra; a he nui tona reo ki te karanga, i mea ia ki nga manu katoa e rere ana i waenganui o te rangi, Haere mai, me huihui mai ki te hapa a te Atua nui;
- 18
- Ki te kai i nga kikokiko o nga kingi, i nga kikokiko o nga rangatira mano, i nga kikokiko o te hunga kaha, i nga kikokiko o nga hoiho, o o ratou kai noho hoki, i nga kikokiko o nga tāngata katoa, o nga mea ehara nei i te pononga, o nga pononga ano hoki, o te hunga nonohi, o te hunga nunui.
- 19
- A ka kite ahau i te kararehe, me nga kingi o te whenua, me a ratou taua, kua huihuia ki te whawhai ki tera e noho ana i runga i te hoiho ki tana taua hoki.
- 20
- Na, ka hopukina te kararehe raua tahi ko te poropiti teka, i mahi ra i nga tohu ki tona aroaro, i whakapohehetia ai te hunga i tango i te tohu o te kararehe, i koropiko hoki ki tona whakapakoko. Na, pangā oratia ana raua tokorua ki te roto kapura e ka ana i te whanariki.
- 21
- Na, te hunga i toe, i whakamatea ratou e tera e noho ra i runga i te hoiho ki te hoari, e puta mai nei i roto i tona mangai: a makona ana nga manu katoa i o ratou kikokiko.
Address: 
Phone: 
Email: