- 1
- A, i tana wāhanga i te whitu o nga hiri, kahore he mea i rangona i te rangi me te mea kotahi te hawhe haora.
- 2
- I kite ano ahau i nga anahera tokowhitu i tu ra i te aroaro o te Atua; a e whitu nga tētere i hoatu ki a ratou.
- 3
- A ka haere mai tetahi atu anahera, ka tu ki te āta, he tahu whakakakara tana, he mea koura; a he maha nga whakakakara i hoatu ki a ia, hei tapiritanga māna ki nga inoinga a te hunga tapu katoa ki runga ki te āta koura i mua i te torona.
- 4
- A, te paoa o nga whakakakara, me nga inoi a te hunga tapu, kake ana i roto i te ringaringa o te anahera i te aroaro o te Atua.
- 5
- A ka mau te anahera ki te tahu whakakakara, whakakiia ana e ia ki te kapura o te āta, pangā ana e ia ki te whenua: na, ko te putanga mai o nga reo, o nga whatitiri, o nga uira, me te ru.
- 6
- Na, ka takatu nga anahera tokowhitu i nga tētere e whitu, ka mea ki te whakatangi.
- 7
- Whakatangi ana te anahera tuatahi, na, he whatu tera he kapura he toto ano hoki i roto, ka pangā ki te whenua: na, kua pau i te ahi te wahi tuatoru o nga rakau, pau ake hoki nga tarutaru matomato katoa.
- 8
- Te whakatangihanga a te rua o nga anahera, na, me te mea he maunga nui tera kua makā ki te moana, e ka ana i te ahi: a ka meinga te wahi tuatoru o te moana hei toto;
- 9
- A mate iho te wahi tuatoru o nga mea hanga i roto i te moana, o nga mea whai ora; te wahi tuatoru hoki o nga kaipuke ngaro iho.
- 10
- A, te whakatangihanga a te toru o nga anahera, na, kua taka iho i te rangi he whetu nui e ka ana, ano he rama, a taka ana ki te wahi tuatoru o nga awa, ki nga puna wai hoki;
- 11
- Te ingoa hoki o te whetu ko Kawa: a ka meinga te wahi tuatoru o nga wai hei womawori; he tokomaha ano hoki nga tāngata i mate i nga wai, no te mea kua kawa.
- 12
- A, te whakatangihanga a te wha o nga anahera, na, kua patua te wahi tuatoru o te ra, me te wahi tuatoru o te marama, me te wahi tuatoru o nga whetu; na kua pouri te wahi tuatoru o aua mea, kihai hoki i mārama te wahi tuatoru o te ra, o te po ano hoki.
- 13
- A i titiro ano ahau, a ka rangona tetahi anahera e rere ana i waenganui o te rangi, he nui tona reo ki te mea mai, Aue, aue, aue, te mate mo te hunga e noho ana i runga i te whenua, i era reo hoki o te tētere a nga anahera tokotoru meake nei tangi!
Address: 
Phone: 
Email: