Romans Chapter 15 - Paipera Tapu 1868 | Te Paipera Tapu 1868

Romans Chapter 15 - Paipera Tapu 1868

1
Te mahi tika ma tatou, ma te hunga kaha he pikau i nga ngoikoretanga o te hunga kaha kore; kaua hoki e whaia ko ta tatou ake i ahuareka ai.
2
Me whai e tatou kia ahuareka mai tona hoa tona hoa, kia whai pai ai, hei hanga mo te whare.
3
Kihai hoki a te Karaiti i whai ki tana ake i ahuareka ai; engari i rite ki te mea kua oti te tuhituhi, Kua tau iho ki a au nga tawainga a te hunga e tawai ana i a koe.
4
Na, nga mea i tuhituhia i mua he mea tuhituhi hei whakaako i a tatou, kia whai tumanakotanga atu ai tatou, i te mea ka whakamanawanui, ka whakamarietia ano hoki e nga Karaipiture.
5
A ma te Atua o te manawanui, o te whakamarie, e homai ki a koutou kia kotahi te whakaaro a tetahi ki tetahi, kia rite ki ta Karaiti Ihu:
6
Kia kotahi ai te ngakau, kia kotahi ai te waha, e whakakororia ai koutou i te Atua, ara i te Matua o to tatou Ariki o Ihu Karaiti.
7
Na, me whakahoa koutou tetahi ki tetahi, kia rite ki a te Karaiti i mea nei i a tatou hei hoa mona kia whai kororia ai te Atua.
8
Na, ko taku kupu tenei, He minita a Ihu Karaiti ki te kotinga, he whakaaro ki te pono o te Atua, kia u ai nga mea i korerotia i mua ki nga mātua:
9
Kia whakakororia ai ano hoki nga tauiwi i te Atua mo tana mahi tohu; kia pera ai me te mea i tuhituhia, Mo tenei mea ka whakaae atu ahau ki a koe i waenganui o nga tauiwi, ka himene atu ki tou ingoa.
10
Tenei ano hoki tetahi kupu āna, Kia hari tahi, e nga tauiwi, me tona iwi.
11
Tenei ano hoki, Whakamoemititia te Ariki, e nga tauiwi katoa; whakamoemititia ano ia, e nga iwi katoa.
12
E mea ana ano hoki a Ihaia, Tera e whai pakiaka a Hehe, me tetahi e whakatika ana hei rangatira mo nga tauiwi; ko ia hei tumanakohanga atu ma nga tauiwi.
13
Na, ma te Atua, nāna nei te tumanako, e whakaki koutou ki te hari katoa, ki te rangimarie, i runga i te whakapono, kia hua ai to koutou tumanako, i runga i te kaha o te Wairua Tapu.
14
Na, e u ana ano toku ake whakaaro ki a koutou, e aku teina, e kī ana i te pai, whawhao rawa ki te matauranga katoa, a e taea ano e koutou te whakatupato tetahi i tetahi.
15
Otiia i nui ai tetahi wahi o taku maia ki te tuhituhi ki a koutou, e aku teina, he whakamahara hoki i a koutou, he mea na te aroha noa kua homai nei ki a au e te Atua,
16
Kia meinga ai ahau hei minita ma Ihu Karaiti ki nga tauiwi, hei mahi i nga mea tapu o te rongo pai a te Atua, kia manakohia ai te whakahere a nga tauiwi, he mea whakatapu na te Wairua Tapu.
17
Na, kua whai whakamanamana nga nei ahau i roto i a Karaiti Ihu, i nga meatanga a te Atua.
18
E kore hoki ahau e maia ki te korero ki tetahi mea kihai nei i meinga e te Karaiti kia mahia e ahau, e taku kupu e taku mahi, hei mea kia ngohengohe mai nga tauiwi,
19
I runga i te kaha o nga tohu, o nga mea whakamiharo, i runga i te kaha o te Wairua o te Atua; no ka tino oti te kauwhau e ahau te rongo pai o te Karaiti ki Hiruharama, a taka noa ki Irurikuma.
20
Ko ia tenei taku tohe ki te kauwhau i te rongo pai, ehara i te mea ki nga wahi kua whakahuatia na a te Karaiti ki reira, kei hunga whare ahau ki runga ki ta tera tangata turanga:
21
Engari kia rite ki te mea kua oti te tuhituhi, Te hunga kihai nei ia i korerotia ki a ratou, e kite ratou: a, te hunga kihai nei i rongo, e mātau ratou.
22
Na konei ano i maha ai oku whakawarenga, tē tae atu ai ahau ki a koutou.
23
Inaianei ia kua kore nei he wahi maku i enei whenua, a ka maha nei aku tau i nui ai toku hiahia kia haere atu ki a koutou:
24
Kei toku haerenga atu ki Hipani, ka tae atu ahau ki a koutou: e mea ana hoki ahau tera ahau e kite i a koutou i toku haerenga atu, a ka kawea ano e koutou ki reira, kia mātua ora tetahi wahi o toku ngakau i a koutou.
25
Inaianei ia e haere ana tenei au ki Hiruharama, ki te mahi mea ma te hunga tapu.
26
Kua pai hoki a Makeronia raua ko Akaia kia meinga tetahi kohikohinga mo nga rawakore o te hunga tapu i Hiruharama.
27
I pai ano; a e tika ana ano kia homai ki a ratou. Kua uru nei nga tauiwi ki a ratou mea o te wairua, whaihoki e tika ana ano kia mahia mai e enei etahi mea o te kikokiko ma ratou.
28
Na, kia oti tenei i a au, a hiri rawa tenei hua hei mea ma ratou, ka tika atu ahau na to koutou wahi ki Hipani.
29
E mātau ana ano ahau, ka haere atu ahau ki a koutou, tera au e haere i runga i te hua noa iho o te manaakitanga o te rongo pai o te Karaiti.
30
Na, he tohe tenei naku ki a koutou, e aku teina, kia whakaaro koutou ki to tatou Ariki ki a Ihu Karaiti, ki te aroha hoki o te Wairua, a kia tohe tahi tatou, ara kia inoi ki te Atua, moku;
31
Kia whakaorangia ahau i te hunga whakateka, i Huria; kia manakohia ano hoki e te hunga tapu taku mea e mahi nei mo Hiruharama;
32
Kia haere hari ai ahau ki a koutou ki te pai te Atua, kia ora tahi ai o tatou ngakau.
33
Na, kia noho te Atua o te rangimarie ki a koutou katoa. Amine.