Romans Chapter 2 - Paipera Tapu 1868 | Te Paipera Tapu 1868

Romans Chapter 2 - Paipera Tapu 1868

1
Na, kahore he kupu whakahoki māu, e te tangata katoa e whakahe ana: i a koe hoki e whakahe ra i tera, e whakahe ana ano koe i a koe ano; kei te mahi hoki koe te kai whakahe i aua mea ra ano.
2
Na, e mātau ana tatou kei runga i te pono te whakahekanga a te Atua mo nga kai mahi i aua mea.
3
A, ko tāu whakaaro ranei tenei, e te tangata e whakahe ana ki nga kai mahi i aua mea, a e mahia ana ano aua mea na e koe, ko koe e ora i ta te Atua whakahe?
4
E whakahawea ana ranei koe ki tona ngawari, ki tana tikanga mahaki, ki tona manawanui, e ranea tonu nei; te mahara ko te ngawari o te Atua hei arahi i a koe ki te ripeneta?
5
Heoi pakeke tonu nei koe kahore e ripeneta tou ngakau, e puranga ana koe i te riri mou, mo te ra o te riri, o te whakakitenga mai ano hoki i ta te Atua whakakitenga tika i te whakawa;
6
Ko tana nei e hoatu ai ki tetahi ki tetahi, ka rite ki ā ratou ake mahi:
7
Ki te hunga e whai ana ki te kororia, ki te honore, ki te matenga-kore, me te mau ano hoki ki te mahi pai, he oranga tonutanga:
8
Ki te hunga ia e totohe ana, a e turi ana ki te pono, e whakarongo ana hoki ki te hē, he riri, he aritarita;
9
He pawera, he rarunga, mo nga wairua tangata katoa e mahi ana i te kino, mo te Hurai ki mua, mo te Kariki ano hoki;
10
He kororia ia, he honore, he rangimarie, mo nga tāngata katoa e mahi ana i te pai, mo te Hurai ki mua, mo te Kariki ano hoki:
11
Kahore hoki ā te Atua whakapai kanohi.
12
Te hunga hoki i hara ture kore, ka mate ture kore ano hoki: me te hunga i hara i runga i te ture, kei te ture ano he whakahe mo ratou;
13
(He teka hoki ko nga kai whakarongo o te ture e tika ki ta te Atua, engari ko nga kai mahi o te ture, e whakatikaia.
14
I te mea hoki e mahia noatia ana nga mea o te ture e nga tauiwi, kahore nei o ratou ture, ko enei, kahore nei o ratou ture, hei ture ano ki a ratou:
15
E whakakite nei hoki ratou i te mahi a te ture he mea tuhituhi ki o ratou ngakau, me te whakaae tahi ano o ratou hinengaro: ko a ratou whakaaro ano hoki kei te whakahehe kei te whakatikatika ranei i tetahi i tetahi;)
16
I te ra e whakaritea ai te whakawa e te Atua mo nga mea ngaro a nga tāngata, he mea whakarite tonu ki taku rongo pai, hei meatanga ma Ihu Karaiti.
17
Na, e karangatia ana koe he Hurai, e whakawhirinaki ana koe ki runga ki te ture, ko te Atua hoki tau e whakamanamana ai,
18
E mohio ana hoki koe ki tana e pai ai, e kitea ana e koe nga mea e rere ke ana i etahi mea, he mea whakaako na te ture;
19
E u ana hoki to whakaaro, ko koe hei kai arahi mo nga matapo, hei māramatanga mo te hunga i roto i te pouri,
20
Hei kai tohutohu mo nga kuare, hei kai whakaako mo nga kohungahunga; kei a koe ano hoki te ahua o te matauranga raua ko te pono i runga i te ture.
21
He kai whakaako koe i tera atu, e kore ianei koe e whakaako i a koe ano? e kauwhau na koe kia kaua e tahae, e tahae ana ranei koe?
22
E mea na koe, Kaua e puremu, e puremu ana ranei koe? e whakarihariha na koe ki nga whakapakoko, e tahae ana ranei koe i nga mea tapu?
23
E whakamanamana na koe ki te ture, kei te whakaiti ranei koe i te Atua i te mea ka takahi koe i te ture?
24
Na koutou hoki i kohukohua ai te ingoa o te Atua i roto i nga tauiwi, i peratia ai me te mea kua oti te tuhituhi.
25
E whai wahi ana hoki te kotinga, ki te mahia e koe te ture: tena ki te takahi koe i te ture, ka tiro tou kotinga hei kotinga kore.
26
Na, ki te mau i te kotinga kore nga tikanga o te ture, e kore ianei tona kotinga kore e kiia hei kotinga?
27
A ki te rite te ture i te mea kihai i kotia maoritia, e kore ianei ia e whakahe ki a koe, ki te tangata i te kupu tuhituhi, i te kotinga, i a koe e takahi na i te ture?
28
Ehara hoki to waho i te Hurai; ehara ano hoki te kotinga i te mea no waho no te kikokiko:
29
Engari tera te Hurai, ko to roto; a, te kotinga no te ngakau, he mea wairua, he teka na te kupu tuhituhi; ehara ano hoki i te mea e whakamoemititia ana e te tangata, engari e te Atua.