Ruth Chapter 2 - Paipera Tapu 1868 | Te Paipera Tapu 1868

Ruth Chapter 2 - Paipera Tapu 1868

1
Na, he whanaunga to Naomi, ara, to tona tahu, he tangata taonga nui, no te hapu o Erimereke; ko Poaha tona ingoa.
2
Na, ko te meatanga mai a Rutu Moapi ki a Naomi, Kia haere ahau ki te māra ki te hamu i nga puku parei i muri i te tangata e manakohia mai ai ahau. Ano ra ko tera, Haere, e taku tamahine.
3
Na, haere ana ia, a, te taenga atu, ka hamu i te māra i muri i nga kai kokoti: a tupono noa mai ia ko te wahi o te māra i a Poaha o te hapu o Erimereke.
4
Na, ko te taenga mai o Poaha i Pete-rehema, a ka mea ki nga kai kokoti, Kia noho a Ihowa ki a koutou. Ano ra ko ratou ki a ia, Kia manaakitia koe e Ihowa.
5
Katahi ka mea a Poaha ki tana tangata i tohutohu nei i nga kai kokoti, Na wai tenei kotiro?
6
Na, ko te whakahokinga mai a te tangata i tohutohu nei i nga kai kokoti, ka mea, Ko te kotiro Moapi tenei i hoki tahi mai nei raua ko Naomi i te whenua o Moapa;
7
I mea mai hoki ia, Kia hamu ahau, ne? kia kohikohi i roto i nga paihere, i muri i nga kai kokoti: heoi haere ana ia, a i konei tonu ia, o te ata iho ano, a taea noatia anaianei. He iti nei tana nohoanga i roto i te whare.
8
Na, ko te meatanga mai a Poaha ki a Rutu, E kore ranei koe e mango mai, e taku tamahine? Kaua e haere ki tetahi māra ke hamu ai; kaua ano hoki e haere atu i konei; engari me noho tonu ki konei ki aku kotiro.
9
Kia matatau atu ou kanohi ki te māra e kotia ana e ratou, ka whai i ratou: kahore ianei ahau i ki atu ki nga taitamariki kia kaua ratou e pa ki a koe? E mate-wai ano hoki koe, haere atu ki nga oko, inu ai i ta nga taitamariki i utu mai ai.
10
Na, ka tapapa iho tera, ka piko iho ki te whenua, a ka mea ki a ia, Na te aha koe i manako mai ai ki a au, i mohio ai hoki ki a au, he manene nei hoki ahau?
11
Na, ka whakahokia mai e Poaha, ka mea ki a ia, Kua ata korerotia mai ki a au nga mea katoa i mea ai koe ki tou hungawai i muri i te matenga o tou tahu, tou whakarerenga hoki i tou pāpā, i tou whaea, i te whenua ano hoki i whanau ai koe, a haere mai ana ki te iwi kihai i mohiotia e koe i mua, ake nei.
12
Ma Ihowa e utu tau mahi; kia ata rite hoki te utu e homai ki a koe e Ihowa Atua o Iharaira, kua tae mai nei hoki koe ki raro ki ona parirau okioki ai.
13
Ano ra ko tera, Kia manakohia mai ahau, e toku ariki; ka ora nei hoki toku ngakau i a koe, he pai hoki to kupu ki to pononga; ko au ia kahore e rite ki tetahi o o pononga wahine.
14
A i mea ano a Poaha ki a ia, I te wa e kai ai, haere mai ki konei, ki te kai taro mau, ka tuku hoki i to kongakonga ki roto ki te winika. Na, ka noho ia ki te taha o nga kai kokoti, i homai ano e ia he witi pāhūhū mana. Na, kai ana ia, a ka makona, a toe ake.
15
Tona whakatikanga ki te hamu, ka ako a Poaha i ana taitamariki, ka mea, Kia hamu ano hoki ia i roto i nga paihere; kaua ano hoki ia e meinga kia whakama.
16
Whakangahorotia ano hoki etahi kapunga mana, whakarerea atu kia kohia e ia, kaua hoki ia e riria.
17
Na, ka hamu ia i te māra, a ahiahi noa, a patupatua ana e ia ana i hamu ai: a ki te whakaaro iho, kotahi te epa parei.
18
Na, tangohia ana e ia, a haere ana ki te pa, a ka kite tona hungawai i ana i hamu ai: i whakaputaina mai ano hoki e ia, i homai ki a ia nga toenga i a ia i makona ra.
19
Na, ko te meatanga mai a tona hungawai ki a ia, I hamu koe ki hea inaianei? i hea hoki koe e mahi ana? kia manaakitia te tangata i mohio ra ki a koe. Na, korerotia atu ana e ia ki tona hungawai te tangata i mahi nei ia ki a ia, a ka mea, Te ingoa o te tangata i mahi nei ahau ki a ia inaianei ko Poaha.
20
Ano ra ko Naomi ki tana hunaonga, Kia manaakitia ia e Ihowa, mo tona aroha kihai nei i mahue ki te hunga ora, ki te hunga mate. Na, ka mea a Naomi ki a ia, E tata ana taua tangata ki a taua, no o taua whanaunga tupu.
21
Na, ka mea mai ano a Rutu Moapi, I mea mai ano hoki ia ki a au, Kia tata tonu koe ki aku tangata, kia poto ra ano aku mea katoa te kokoti.
22
Na, ko te meatanga a Naomi ki a Rutu, ki tana hunaonga, E pai ana, e taku tamahine, ki te haere tahi koe me ana kotiro, kei riria koe i te māra ke.
23
Na, kei te whai tonu ia i nga kotiro a Poaha, ka hamu, a poto noa nga parei te kokoti, me te witi hoki te kokoti; i tona hungawai ia tona nohoanga.