Ruth Chapter 3 - Paipera Tapu 1868 | Te Paipera Tapu 1868

Ruth Chapter 3 - Paipera Tapu 1868

1
Na, ka mea a Naomi tona hungawai ki a ia, Kaua ianei ahau e rapu i te okiokinga mou, e taku tamahine, e puta mai ai te pai ki a koe?
2
Ehara ianei a Poaha i te whanaunga no taua nāna nei aua kotiro, ou hoa na? Nana, ko a tenei po ia whakarererere ai i te papapa o te parei i te patunga witi.
3
Na, horoia koe, ka whakawahi i a koe, ka kakahu ai i ou kakahu, ka haere ki raro ki te patunga witi; kaua koe e whakaaturia ki taua tangata, a mutu noa tana kai, tana inu.
4
A ka takoto ia, na, me titiro koe ki te wahi e takoto ai ia; katahi ka haere atu, ka hura i nga kakahu o ona waewae, ka takoto; ko reira ia whakaatu ai ki a koe i tau e mea ai.
5
Na, ka mea mai tera ki a ia, Maku e mea nga mea katoa i korerotia mai na e koe ki a au,
6
Na, ko tana haerenga ki raro ki te patunga witi, a meatia ana e ia nga mea katoa i whakahaua mai e tona hungawai ki a ia.
7
Na, ka kai a Poaha, ka inu, a ora ana tona ngakau, katahi ka haere, ka takoto ki te pito o te puranga: na, ko te ata haeretanga mai o tera, hurahia ana nga kakahu o ona waewae, na, kua takoto.
8
Na, i waenganui po ka oho te mauri o taua tangata, a ka tahuri mai: na, he wahine e takoto ana i ona waewae.
9
Na, ka mea ia, Ko wai koe? a ka mea ake tera, Ko Rutu ahau, ko to pononga wahine: na, uwhia iho te pito o tou ki to pononga; he whanaunga tupu hoki koe.
10
Na, ko tana meatanga mai, Kia manaakitia koe e Ihowa, e taku tamahine; nui atu hoki i to te timatanga tou aroha o te whakamutunga, i a koe kihai nei i aru i nga taitama, i te mea rawa-kore, i te mea whai taonga ranei.
11
Na, kaua e wehi, e taku tamahine; ka meatia e ahau ki a koe au mea katoa i ki mai ai: e mohio ana hoki te pa katoa o toku iwi he wahine koe e uaua ana ki te pai.
12
Na, e tika ana ano he whanaunga tupu ahau nou; otiia tena ano tetahi e tata rawa ana i a au.
13
Takoto marie i tenei po; a i te ata ki te whakawhanaunga ia ki a koe, e pai ana; mana te tikanga whanaunga; a ki te kahore ia e pai kia māna te tikanga o te whanaunga ki a koe, na, maku te tikanga whanaunga ki a koe; e ora ana a Ihowa. Ata takoto, kia taea ra ano te ata.
14
Na, takoto tonu ia ki ona waewae, a taea noatia te ata; a ka maranga i te mea e kore tona hoa e mohiotia e te tangata. Na, ka mea mai tera, Kei mohiotia i haere mai he wahine ki te patunga witi.
15
I mea mai ano ia, Tena koa tou kakahu ra. Puritia. Na, puritia ana e ia. Katahi ka mehuatia atu etahi parei e ia, e ono nga mehua: a whakawahā atu ana ki a ia; na, haere ana ia ki te pa.
16
A, tona taenga mai ki tona hungawai, na, ka mea tera, Ko wai koe e taku tamahine? Na, korerotia ana e ia ki a ia nga mea katoa i mea ai taua tangata ki a ia.
17
I mea ano ia, Ko enei mehua parei e ono i homai e ia ki a au; i mea hoki ki a au, Kei haere kau koe ki tou hungawai.
18
Na, ko tana meatanga mai, Ata noho, e taku tamahine, kia mohiotia ra ano e koe te tukunga iho o tenei mea: e kore hoki e whakamutua ta taua tangata, kia oti ra ano tenei mea i a ia aianei.