- 1
- I haere whakahea tau e aroha na, e te ataahua rawa o nga wahine? I anga whakahea tau e aroha na? Ma tatou tahi hoki ia e rapu.
- 2
- Kua riro taku e aroha nei ki raro ki tona kāri, ki nga tupuranga o nga kinaki kakara, ki nga kāri kai ai, ki te kohi i nga rengarenga.
- 3
- Kei taku e aroha nei ahau, kei a au ano taku e aroha nei: e kai ana ia i roto i nga rengarenga.
- 4
- Ataahua tonu koe, e taku hoa, he pera ano me Tirita; ahuareka rawa koe, pera tonu me Hiruharama; whakawehi rawa, koia ano kei nga kara o te ope.
- 5
- Tahuri atu ou kanohi i a au, ka riro hoki ahau i a raua; ou makawe, koia ano kei te kahui koati e kai ana i Kireara.
- 6
- Ou niho, ano he kahui hipi e haere mai ana i te horoi, rite katoa i te māhanga, kahore hoki he pakoro i roto i a ratou.
- 7
- Rite tonu ki tetahi wahi o te pamekaranete ou rahirahinga i roto i ou makawe.
- 8
- E ono tekau enei kuini, e waru tekau nga wahine iti, me nga wahina e kore e taea te tatau.
- 9
- He mea kotahi taku kukupa, taku mea pai rawa, ko ia anake ta tona whaea, he mea i paingia rawatia e te wahine i whanau ai ia: i kite nga tamahine, kei te manaaki i a ia, nga kuini, me nga wahine iti, whakamoemiti ana ratou ki a ia.
- 10
- Ko wai tenei e matakitaki mai nei, ano ko te ata, ataahua tonu, ano ko te marama, mārama rawa, koia ano kei te ra, whakawehi rawa, me te mea ko nga kara o te ope?
- 11
- I haere atu ahau ki te kāri naiti, kia kite i nga hua o te awaawa; kia kite e tupu ana ranei te waina, e kopuku ana ranei nga pamekaranete.
- 12
- Mohio rawa ake ahau kua meinga ahau e toku wairua kia rite ki nga hariata o Aminaripi.
- 13
- Hoki mai, hoki mai, e Hurami, hoki mai, hoki mai, kia matakitaki atu ai matou ki a koe. He aha ta koutou e kite ai i a Hurami? Me te mea he ropu no nga ope e rua.
Address: 
Phone: 
Email: