- 1
- Whakamaharatia ratou kia ngohengohe ki nga rangatiratanga ki nga mana, kia rongo ki nga rangatira, kia takatu ki nga mahi pai katoa;
- 2
- Kia kaua e korerotia kinotia tetahi tangata, kia kaua e whawhai, kia ngakau ngawari, kia nui te māhaki o te ngakau e whakaputaina ki nga tāngata katoa.
- 3
- He whakaaro kore hoki tatou i mua, he tutū, e tinihangatia ana, he pononga na nga hiahia, na nga whakaahuareka maha, e noho ana i runga i te nanakia, i te hae, he hunga whakarihariha, e mauahara ana tetahi ki tetahi.
- 4
- Otira i te mea ka puta mai nei te tikanga ngawari me te aroha o te Atua o to tatou Kai whakaora ki nga tāngata,
- 5
- Ehara i te mea na nga mahi tika i mahia e tatou, engari na tana mahi tohu i whakaorangia ai tatou e ia, he meatanga na te horoinga o te whanautanga houtanga, na te whakahoutanga a te Wairua Tapu;
- 6
- I ringihia nuitia mai nei e ia ki runga ki a tatou, he mea na Ihu Karaiti na to tatou Kai whakaora;
- 7
- Kia whakatikaia ai tatou e tona aroha noa, kia whiwhi ai ki te taonga, ara ki te oranga tonutanga e tumanakohia atu nei.
- 8
- He korero pono tenei; a e mea ana ahau kia kaha to kauwhautanga i enei mea; kia mahara te hunga kua whakapono ki te Atua ki nga mahi pai kia mahia. Ko nga mea enei e ataahua ana, e whai pai ana mo nga tāngata.
- 9
- Ko nga uiuinga kuare ia, me nga whakapapa tupuna, whakarerea atu, me nga totohe, me nga whawhai ki nga mea o te ture, kahore hoki he pai o aua mea, he mea hanga noa.
- 10
- He tangata whakapono hē, ka kotahi ka rua nga whakatupatotanga, whakarerea atu;
- 11
- E mātau ana hoki koe kua whakaputaia ketia taua tangata pera, kei te hara ano hoki, he mea whakahe e ia ake ano.
- 12
- Ka tonoa atu e ahau ki a koe a Aratema, a Tikiku ranei, kia puta tou uaua ki te haere mai ki a au ki Nikopori: kua takoto hoki taku tikanga kia noho ki reira i te hotoke.
- 13
- Kia puta tou whakaaro kia kawea mai a Hina te kai whakaako o te ture, raua ko Aporo, kei kore tetahi mea mo raua.
- 14
- Kia whakaakona hoki o tatou tāngata, ki nga mahi pai kia mahia hei mea mo te mate e kaha ana te pēhi, kei hua kore ratou.
- 15
- Tenei te oha atu nei ki a koe oku hoa katoa. Oha atu ki te hunga e aroha ana ki a matou i runga i te whakapono. Kia tau te aroha noa ki a koutou katoa. Amine.
Address: 
Phone: 
Email: