- 1
- Inoia he ua i a Ihowa i te wa o to muri ua; a ka hangā e Ihowa nga kapua uira, he nui ano te ua e homai e ia ki a ratou, he tarutaru ma tenei tangata, ma tenei tangata, i te mara.
- 2
- He tekateka noa hoki te korero a nga terapimi, he teka te mea i kitea e nga tohunga, he horihori nga moe i korerotia e ratou; he hanga noa iho ta ratou whakamarie, no reira haere ana ratou ano he kahui hipi; karangirangi kau ana ratou i te kore hepara.
- 3
- I mura taku riri ki nga hepara, i whiua ano e ahau nga koati: kua tae mai hoki a Ihowa o nga mano ki tana kahui ki te whare o Hura, a meinga ana ratou e ia hei hoiho kororia mona i te tatauranga.
- 4
- No roto i a ia te putanga ake o te koki, no roto i a ia te whao, no roto i a ia te kopere mo te tatauranga, no roto i a ia nga kai akiaki katoa rupekerupeke.
- 5
- A ka rite ratou ki nga marohirohi e takatakahi ana i o ratou hoa riri i te paru o nga waharoa i te mea e whawhai ana: ka whawhai ano ratou, no te mea kei a ratou a Ihowa, a ka whakama nga kai eke hoiho.
- 6
- Ka whakakahangia ano hoki e ahau te whare o Hura, ka whakaorangia ano e ahau te whare o Hohepa, ka whakahokia ano ratou e ahau, ka meinga kia noho; no te mea ka tohungia ratou e ahau, a me te mea kihai ratou i peia e ahau, ko ahau hoki ko Ihowa to ratou Atua, ka whakao atu ano ahau ki a ratou.
- 7
- Ka rite ano hoki nga Eperaimi ki te marohirohi, ka koa ano o ratou ngakau me te mea na te waina: ka kite ano a ratou tamariki, a ka koa; ka whakamanamana o ratou ngakau ki a Ihowa.
- 8
- Ka whiowhio ahau ki a ratou, ka huihuia mai ano ratou e ahau, kua hokona hoki ratou e ahau; ka tini ano hoki ratou, ka pera me ratou i tini ra.
- 9
- Ka whakatōkia ano ratou e ahau ki roto ki nga iwi, ka mahara ano ratou ki a au i roto i te hunga i tawhiti, ka ora tahi ano ratou me a ratou tamariki, a ka hoki ano.
- 10
- Ka whakahokia mai ano ratou e ahau i te whenua o Ihipa, ka huihuia mai ano hoki ratou i Ahiria; ka kawea ano ratou e ahau ki te whenua o Kireara, ki Repanona ano hoki, tē kitea he wahi mo ratou.
- 11
- Ka tika atu ano hoki te whakapawera i waenga moana, a ka patua nga ngaru i te moana, ka maroke ano hoki nga wahi hohonu o te awa, ka riro iho ano hoki te whakapehapeha o Ahiria, ka riro ke ano te hepeta o Ihipa.
- 12
- Ka whakakahangia ano ratou e ahau i runga i a Ihowa; ka haereere ano ratou i runga i tona ingoa, e ai ta Ihowa.
Address: 
Phone: 
Email: