Zechariah Chapter 13 - Paipera Tapu 1868 | Te Paipera Tapu 1868

Zechariah Chapter 13 - Paipera Tapu 1868

1
I taua rangi ano ka tuwhera he puna mo te whare o Rawiri ratou ko nga tangata o Hiruharama, hei mea mo te hara, mo te poke.
2
I taua rangi ano, e ai ta Ihowa o nga mano, ka hatepea atu e ahau nga ingoa o nga whakapakoko i runga i te whenua; e kore ano e maharatia a muri ake nei, ka meinga ano e ahau nga poropiti, me te wairua poke ano, kia kore atu i runga i te whenua.
3
Na, tenei ake ki te poropiti tetahi tangata i muri ake nei, ka mea tona pāpā ki a ia, raua ko tona whaea i whanau ai ia, E kore koe e ora; kua korero teka hoki koe i runga i te ingoa o Ihowa: na, ka tu ia te wero e tona pāpā raua ko tona whaea i whanau ai ia, ina poropiti ia.
4
I taua rangi ano ka whakama nga poropiti, tenei tangata, tenei tangata, ki tana i kite ai, i te mea ka poropiti ia; e kore ano e kakahuria e ratou he kakahu huruhuru hei mea tinihanga.
5
A ka mea ano ia, Ehara ahau i te poropiti, he paruauru ahau, he mea whakaako hoki ahau na te tangata ki te atawhai kararehe no toku taitamarikitanga ake ano.
6
A hei kupu ano tenei ki a ia, He aha enei patunga i o ringaringa? a ka mea ia, Ko oku patunga i roto i te whare o oku hoa aroha.
7
E ara, e te hoari, ki toku hepara, ki te tangata i takahoatia ki a au, e ai ta Ihowa o nga mano, patua te hepara, kia marara ano hoki nga hipi; ka tahuri atu ano hoki toku ringaringa ki nga mea ririki.
8
Na i te whenua katoa, e ai ta Ihowa, e rua nga wahi o reira ka hatepea atu, ka mate, ka toe ia te tuatoru o nga wahi o reira.
9
Ka kawea ano e ahau te tuatoru o nga wahi i roto i te ahi, ka tahia ano hoki te para, ka peratia me te hiriwa e tahia ana, ka whakamatautauria ano ratou e ahau, ka peratia me te koura; ka karanga ratou ki toku ingoa, a ka whakarongo ahau ki a ratou: ka mea ahau, He iwi ratou noku; a ka mea ratou, Ko Ihowa toku Atua.