- 1
- Nana, kei te haere mai te ra o Ihowa, a, ka wehewehea o taonga parakete i roto i a koe.
- 2
- Ka huihuia ano hoki e ahau nga iwi katoa ki te whawhai ki a Hiruharama, a ka horo te pa, ka pahuatia nga whare, ka moea nga wahine; a ko tetahi hawhe o te pa ka riro hei whakarau, e kore ano ia te toenga o te iwi e hatepea atu i roto i te pa.
- 3
- Katahi a Ihowa ka haere atu, ka whawhai ki aua iwi, ka rite ki te ra i whawhai ai ia i te ra o te tatauranga.
- 4
- Ka tu ano hoki ona waewae i taua ra ki runga ki Maunga Oriwa, ki tera i te ritenga atu o Hiruharama i te taha ki te rawhiti, a ka pakaru a Maunga Oriwa i waenganui ona, te taha ki te rawhiti te taha ano ki te hauauru, he nui noa atu te takiwa maunga, a ka neke atu tetahi hawhe o te maunga ki te nota, tetahi hawhe ona ki te tonga.
- 5
- A ka oma atu koutou ki te takiwa o oku maunga; no te mea ka tutuki atu te takiwa o nga maunga ki Atara: na, ta koutou oma ka rite ki ta koutou omanga atu i te ru i nga ra o Utia kingi o Hura: tera ano a Ihowa toku Atua e haere mai, ko te hunga tapu katoa hei hoa mou.
- 6
- Na, i taua rangi e kore te māramatanga e mārama, e kore ano e pouri.
- 7
- Erangi kotahi tonu taua rangi, he mea e mohiotia ana e Ihowa, ehara i te ra, ehara i te po: na, i nga wa o te ahiahi ka mārama.
- 8
- Na, i taua rangi ka puta atu he wai ora i Hiruharama, tetahi hawhe ki te moana i te aroaro, tetahi hawhe ki te moana i te tuara; i te raumati taua hanga, i te hotoke ano.
- 9
- A ko Ihowa hei kingi mo te whenua katoa: i taua rangi he kotahi a Ihowa, tona ingoa ano he kotahi ano.
- 10
- A hei mānia katoa te whenua, a taka noa, i Kepa tae noa ki Rimono ki te taha ki te tonga o Hiruharama: ka neke ake ano hoki, ka nohoia ano i tona wahi ano, i te kuwaha o Peniamine tae noa ki te wahi i te kuwaha tuatahi, ki te kuwaha i te koki, i te pourewa o Hananeere tae noa ki nga poka waina a te kingi.
- 11
- Ka nohoia ano a reira, a heoi ano whakangaromanga; ka noho ano hoki a Hiruharama i runga i te rangimarie.
- 12
- Ko te whiunga ano hoki tenei i whuia ai e Ihowa nga iwi katoa i whawhai nei ki a Hiruharama; Ka pirau o ratou kikokiko i te mea e tu ano o ratou waewae, ka pirau ano o ratou kanohi i roto i nga pae, ka pirau ano o ratou arero i roto i o ratou mangai.
- 13
- I taua rangi ano he nui ta Ihowa whakaoho i roto i a ratou; ka hopukia atu ano e ratou te ringaringa o tona hoa, o tona hoa, ka ara ake ano o ratou ringaringa ki te ringaringa o tona hoa, o tona hoa.
- 14
- Tera ano a Hura ka whawhai ki a Hiruharama; ka huihuia mai ano hoki nga rawa o nga iwi katoa i tetahi taha, i tetahi taha, te koura, te hiriwa, nga kakahu, nui whakaharahara.
- 15
- A ka rite te whiunga o te hoiho, o te muera, o te kamera, o te kaihe, o nga kararehe katoa i roto i enei puni ki tenei whiu.
- 16
- Tenei ake, na, nga morehu katoa o nga iwi katoa i haere mai ki Hiruharama, ka haere mai ratou i ia tau, i ia tau ki te koropiko ki te Kingi, ki a Ihowa o nga mano, ki te whakarite hoki i te hakari whare wharau.
- 17
- Na, te tangata e kore e haere mai i roto i nga hapu o te whenua ki Hiruharama ki te koropiko ki te Kingi, ki a Ihowa o nga mano, kahore he ua mo ratou.
- 18
- A ki te kahore te hapu o Ihipa e haere mai, e tae mai, te hunga kahore nei o ratou ua, ka pa ano te whiu e whiua ai e Ihowa nga iwi kahore nei e haere mai ki te whakarite i te hakari whare-wharau.
- 19
- Ko te utu-hara tenei mo Ihipa, ko te utu-hara ano ia mo nga iwi katoa e kore e haere mai ki te whakarite i te hakari o nga tapenakara.
- 20
- I taua rangi ka piri ki nga pere o nga hoiho, TAPU KI A IHOWA, ka rite ano hoki nga pāta i roto i te whare o Ihowa ki nga peihana i mua i te aata.
- 21
- Ina, nga pāta katoa i Hiruharama i a Hura he tapu ki a Ihowa o nga mano, a ka haere mai te hunga katoa e patu whakahere ana, ka tango i etahi hei kohua ma ratou: kahore ano hoki he Kanaani a muri ake nei i roto i te whare o Ihowa o nga mano i taua ra.
Address: 
Phone: 
Email: