Zechariah Chapter 5 - Paipera Tapu 1868 | Te Paipera Tapu 1868

Zechariah Chapter 5 - Paipera Tapu 1868

1
Na, ka tahuri ahau, a ka ara ake oku kanohi, taku tirohanga atu, na, ko tetahi pukapuka e rere-a-manu ana.
2
Na, ko tana meatanga mai ki a au, Ko te aha e kitea ana e koe? Ano ra ko ahau, He pukapuka e rere ana taku e kite nei; tona roa e rua tekau nga whatianga, tona whanui kotahi tekau nga whatianga.
3
Katahi tera ka ki mai ki a au, Ko te kanga tenei ka puta atu nei ki te mata o te whenua katoa: nga tangata katoa hoki e tahae ana ka hatepea atu i tenei taha, ka rite ki ta tenei; a, nga tangata katoa e oati teka ana, ka hatepea atu i tera taha, ka rite ki ta tenei.
4
Maku ano e mea kia puta atu, e ai ta Ihowa o nga mano, a ka uru ki roto ki te whare o te tahae, ki roto ano ki te whare o te tangata i oatitia tekatia ai toku ingoa; ka mau ano hoki ki roto ki tona whare, a ka pau, ona rakau ano hoki, me ona kohatu ano.
5
Katahi ka puta atu te anahera i korero ki a au, a ka mea ki a au, Tena ra, e ara o kanohi, tirohia atu ko te aha tenei ka puta nei.
6
Ano ra ko ahau, He aha tena? A ka ki mai ia, He epa tenei e puta atu ana. I ki mai ano ia, Ko to ratou ahua tenei i te whenua katoa.
7
Na, ko tetahi taranata matā kua oti te hapai ake: he wahine ano tenei te noho nei i roto i te epa.
8
I ki mai ano ia, He kino tenei. Na, kua makā e ia ki roto ki te epa, a makā ana e ia te poro matā ki runga ki nga ngutu o taua epa.
9
Na, kua anga ake oku kanohi, a ka kite ahau, na, tokorua nga wahine e puta mai ana, i roto ano te hau i o raua parirau; o raua parirau hoki koia ano kei o te tāka: a hapainga ake ana e raua te epa ki te takiwa o te whenua, o te rangi.
10
Na, ko taku kianga atu ki te anahera i korero mai ki a au, E maua ana e enei te epa ki hea?
11
A, ka ki mai tera ki a au, Kia hangā ai he whare mona ki te whenua o Hinara; ka whakapumautia ano hoki ki reira, ka whakaturia ki runga ki tona turanga.