- 1
- Na, kua whawhai nga Pirihitini ki a Iharaira, a ka whati nga tangata a Iharaira i te aroaro o nga Pirihitini, a hinga ana, mate rawa, i runga i Maunga Kiripoa.
- 2
- Na, ka whaia e nga Pirihitini a Haora ratou ko ana tama, a patua iho e nga Pirihitini a Honatana ratou ko Apinarapa, ko Marikihua, nga tama a Haora.
- 3
- Na, kua nui haere te whawhai ki a Haora, a kua mau ia i nga kai kopere; kua tu hoki i nga kai kopere.
- 4
- Katahi a Haora ka mea atu ki te kai mau o ana patu, Unuhia to hoari, werohia hoki ahau; kei haere mai tenei hunga kokoti-kore, kei whakatupu kino i a au. Heoi kihai i pai te kai mau o ana patu; he nui hoki no tona hopohopo. Na, ka mau a Haora ki tana hoari, hinga iho ki runga.
- 5
- A, te kitenga o te kai mau o ana patu, kua mate a Haora, na, ka hinga ano hoki ia ki runga ki te hoari, a ka mate.
- 6
- Na, ka mate a Haora me ana tama tokotoru, me tona whare katoa, mate tahi ana ratou.
- 7
- A, te kitenga o nga tangata katoa o Iharaira i te raorao kua whati ratou, a kua mate a Haora, ratou ko ana tama, na, whakarerea ake e ratou o ratou pa, a rere ana; na, ka haere mai nga Pirihitini, a nohoia iho e ratou.
- 8
- A, i te aonga ake, i te haerenga mai o nga Pirihitini ki te muru i te hunga i patua, na, ka kitea e ratou a Haora ratou ko ana tama e takoto ana i runga i Maunga Kiripoa.
- 9
- Na, huia ana ona e ratou, tangohia ana e ratou tona upoko me ana patu, tonoa ana e ratou kia kawea puta noa i te whenua o nga Pirihitini, a, tawhio noa, kia kauwhautia ki ā ratou whakapakoko, ki te iwi.
- 10
- I whakatakotoria ano hoki e ratou ana patu ki te whare o o ratou atua, ko tona upoko titia ake e ratou ki te whare o Rakono.
- 11
- Te rongonga o Iapehe-kireara katoa ki nga mea katoa i mea ai nga Pirihitini ki a Haora,
- 12
- Te tino whakatikanga ake o nga tangata marohirohi katoa, tangohia iho e ratou te tinana o Haora, me nga tinana o ana tama, kawea mai ana e ratou ki Iapehe, tanumia ana e ratou o ratou wheua ki raro i tetahi oki i Iapehe. Na, e whitu nga ra i noho puku ai ratou i te kai.
- 13
- Na, kua mate a Haora mo tona he i he ai ia ki a Ihowa, mo te kupu a Ihowa kihai nei i puritia e ia, mona hoki i ui, i rapu whakaaro ki te atua maori;
- 14
- Mona hoki kihai i rapu whakaaro i a Ihowa, na, whakamatea iho ia e ia, a whakariroia ketia ana te kingitanga ki a Rawiri tama a Hehe.
Address: 
Phone: 
Email: