- 1
- A, te rongonga o te Kuini o Hepa ki te rongo o Horomona ki tana i mea ai mo te ingoa o Ihowa, ka haere mai ia ki te whakamatau i a ia ki nga kupu pakeke.
- 2
- Na, haere mai ana ia ki Hiruharama, nui atu hoki te tira, he kamera e waha ana i nga mea kakara, i tona nui o te koura, i te kohatu utu nui; na, te haerenga mai ki a Horomona, ka korerotia e ia ki a ia nga mea katoa i roto i tona ngakau.
- 3
- A, whakaaturia ana e Horomona ki a ia te tikanga o ana kupu katoa, kahore he kupu i ngaro i te kingi, i kore te whakaatu ki a ia.
- 4
- A, te kitenga o te Kuini o Hepa i te mohiotanga katoa o Horomona, i te whare ano hoki i hangā e ia,
- 5
- I te kai o tana tepu, i te nohoanga iho o ana tangata, i te turanga o ana kai mahi, i o ratou kakahu, i ona kai riringi waina, i tona pikitanga i piki atu ai ia ki te whare o Ihowa, na, kore ake he wairua i roto i a ia.
- 6
- Na, ko tana meatanga atu ki te kingi, Pono tonu nga mea i rongo ai ahau i toku whenua mo au korero, mo tou mohiotanga.
- 7
- Heoi kihai ahau i whakapono ki aua korero, a tae noa mai ahau, kite noa oku kanohi. Nana, kihai te hawhe i korerotia mai ki a au, kua peke noa ake tou mohio, tou pai i te rongo i rongo ai ahau.
- 8
- Ano te hari o o tangata, ano te hari o enei pononga au e tu tonu nei i tou aroaro, e whakarongo nei ki tou mohiotanga!
- 9
- Kia whakapaingia a Ihowa tou Atua i whakaahuareka mai nei ki a koe, i homai nei i a koe ki runga ki te torona o Iharaira, he aroha mau tonu hoki no Ihowa ki a Iharaira; na, meinga ana koe e ia hei kingi, hei mahi i te whakarite whakawa, i te tika.
- 10
- Na, homai ana e ia ki te kingi kotahi rau e rua tekau nga taranata koura, tona tini ano hoki o nga mea kakara, me nga kohatu utu nui; kahore he mea kakara i tae mai i muri nei hei rite te nui ki enei i homai nei e te Kuini o Hepa ki a Kingi Horomona.
- 11
- Nga kaipuke ano hoki o Hirama, i kawea mai ai te koura i Opira, kei te kawe mai ano hoki i nga rakau aramuka i nga kohatu utu nui i Opira tona tini noa atu.
- 12
- Na, ka hangā aua rakau aramuka e te kingi hei pou mo te whare o Ihowa, mo te whare ano hoki o te kingi, hei hāpa ano hoki, hei hatere, hei mea ma nga kai waiata: kahore ano i tae noa mai he rakau aramuka hei rite, kahore ano hoki i kitea i mua, a taea noatia tenei ra.
- 13
- Na, ka homai e Kingi Horomona ki te Kuini o Hepa nga mea katoa i pai ai ia, ana hoki i tono ai, he tapiri ki runga ki nga mea i homai e te ringa o kingi Horomona ki a ia. Katahi ia ka tahuri, a, haere ana ratou ko ana tangata ki tona whenua.
- 14
- Na, te taimaha o te koura i tae mai ki a Horomona i te tau kotahi, e ono rau e ono tekau ma ono nga taranata koura.
- 15
- Tena ano etahi atu, ko a nga kai rapu taonga, me nga mea i riro mai i nga kai hokohoko, me a nga kingi katoa o Arapia, me a nga kawana o te whenua.
- 16
- Na, ka hangā e Kingi Horomona etahi pukupuku, e rua nga rau, he mea patu te koura: e ono rau nga hekere koura i meatia ki te pukupuku kotahi.
- 17
- Me etahi pukupuku iti iho, e toru nga rau, he mea patu ano te koura: e toru nga pauna i meatia ki te pukupuku kotahi: a, whakatakotoria ana aua mea e te kingi ki te whare o te ngahere o Repanona.
- 18
- I hangā ano hoki e te kingi tetahi torona nui ki te rei, whakakikoruatia iho e ia ki te koura pai rawa.
- 19
- A, e ono nga kaupae ki te torona, he mea porotaka a runga o te torona i te taha ki muri; he okiokinga ringaringa ano hoki kei te wahi e nohoia ana, i tetahi taha, i tetahi taha, a, e rua nga raiona e tu ana i te taha o nga okiokinga.
- 20
- Kotahi tekau ma rua hoki nga raiona i reira e tu ana i tetahi taha, i tetahi taha, i runga i nga kaupae e ono; kahore he mea pera i hangā i tetahi atu rangatiratanga.
- 21
- Na, nga oko inu katoa a Kingi Horomona, he koura kau; me nga oko katoa o te whare o te ngahere o Repanona, he koura para-kore; kahore he hiriwa: kihai tera i kiia he mea nui i nga ra o Horomona.
- 22
- He maha hoki a te kingi kaipuke ki Tarahihi i te moana, he mea huihui ki nga kaipuke a Hirama: kotahi te unga mai i nga tau e toru o nga kaipuke o Tarahihi, hei kawe mai i te koura, i te hiriwa, i te rei, i nga api, me nga pikoki.
- 23
- Na, nui atu a Kingi Horomona i nga kingi katoa o te whenua te whai taonga, te mohio.
- 24
- I whaia mai ano a Horomona e nga whenua katoa, kia rongo ai ratou i tona mohiotanga i homai nei e te Atua ki tona ngakau.
- 25
- Me te kawe mai ano ratou i tana hakari, i tana hakari, i nga oko hiriwa, i nga oko koura, i nga kakahu, i nga mea mo te whawhai, i nga kakara reka, i nga hoiho, i nga muera, he mea tatau a tau tonu.
- 26
- Na, ka amia mai e Horomona nga hariata, nga kai eke hoiho: kotahi mano e wha rau ana hariata, tekau ma rua mano ano hoki nga kai noho hoiho, a ka meinga ratou e ia kia kawea ki nga pa hariata, ki te kingi ano hoki ki Hiruharama.
- 27
- Na, meinga ana te hiriwa o Hiruharama e te kingi kia rite ki nga kohatu; i meinga ano hoki e ia nga hita kia rite ki nga hikamora i te raorao te tini.
- 28
- A, i kawea mai ano he hoiho mo Horomona i Ihipa, he miro ano hoki, a rite tonu te utu i riro mai ai te miro i nga kai hoko a te kingi.
- 29
- Na, e ono rau nga hekere hiriwa i riro mai ai te hariata i puta mai ai i Ihipa, a, o te hoiho, kotahi rau e rima tekau. Ko ratou ano hoki hei kawe mai mo nga kingi katoa o nga Hiti, mo nga kingi ano hoki o Hiria.
Address: 
Phone: 
Email: