- 1
- Katahi ka mau a Hamuera ki tetahi pounamu hinu, ringitia ana e ia ki runga ki tona mātenga; na, ka kihi ia i a ia, ka mea, He teka ianei no te mea kua oti koe te whakawahi e Ihowa hei rangatira mo tona wahi tupu?
- 2
- Ka mawehe atu koe i a au aianei, ka tupono koe ki etahi tangata tokorua ki te taha o te tanumanga o Rahera ki te rohe ki a Peniamine, ki Tereta, na, ka mea mai raua ki a koe, Kua kitea nga kaihe i haere na koe ki te rapu: ko tou pāpā hoki, mahue ake nga whakaaro ki nga kaihe, na, kei te manukanuka tera ki a korua; e mea ana, Me pehea ahau ki taku tamaiti?
- 3
- Na, ka haere tonu atu koe i reira, a ka tae ki te mānia o Taporo, ka tupono mai ki a koe etahi tangata tokotoru e haere ana ki runga ki te Atua ki Pete-ere, e toru nga kuao koati e kawea ana e tetahi, e toru nga rohi taro e kawea ana e tetahi, ko tetahi hoki e mau ana i te pounamu waina.
- 4
- Na, ka oho mai ratou ki a koe, ka homai ano hoki etahi taro e rua ki a koe, a ka tangohia e koe i o ratou ringa.
- 5
- Muri iho ka tae koe ki te puke o te Atua, kei reira nei nga hoia pupuri a nga Pirihitini: a, tou taenga atu ki reira ki te pa, na, ka tutaki koe ki te ropu poropiti e haere iho ana i runga i te wahi tiketike, a i mua i a ratou ko te hatere, ko te timipera, ko te putorino, ko te hāpa; me te poropiti ano ratou.
- 6
- Na, ka puta mai te Wairua o Ihowa ki runga ki a koe, a ka poropiti tahi koutou, ka rerekē tou ahua, ka whakatangata-kē koe.
- 7
- E puta mai ena tohu ki a koe, katahi koe ka mea i ta tou ringa e tupono atu ai; no te mea kei a koe te Atua.
- 8
- Katahi koe ka haere i mua i a au ki Kirikara; na, tena ahau te haere atu na ki raro ki a koe ki te whakaeke i nga tahunga tinana, ki te patu i nga patunga whakamarie: kia whitu nga ra e tatari ai koe ki toku taenga atu ki a koe, katahi ka whakaaturia atu e ahau ki a koe tau e mea ai.
- 9
- Na, te tahuritanga mai o tona tuara, te mawehenga atu i a Hamuera, kua puta ke i to Atua he ngakau mona, a puta katoa mai ana aua tohu i taua rangi ano.
- 10
- A, to raua taenga ki reira ki te puke, na, ko tetahi ropu poropiti kua tutaki ki a ia: te tino putanga mai o te Wairua o te Atua ki runga ki a ia, na, poropiti ana ia i roto i a ratou.
- 11
- A, te kitenga o te hunga katoa i mohio ki a ia i mua ake, na, kei roto ia i nga poropiti e poropiti ana; katahi ka mea te iwi tetahi ki tetahi, He aha tenei i puta mai nei ki te tama a Kihi? Kei roto ano ranei a Haora i nga poropiti?
- 12
- Na, ko te whakahokinga mai a tetahi o reira, te meatanga mai, Ha, ko wai to ratou pāpā? No reira te whakatauki nei, Kei roto ano ranei a Haora i nga poropiti?
- 13
- A ka mutu tana mahi poropiti, haere ana ia ki te wahi tiketike.
- 14
- Na ko te meatanga mai a te matua kēkē o Haora ki a raua ko tana tangata, I haere korua ki hea? A ka ki atu ia, Ki te rapu i nga kaihe: a ka kite maua kahore ano ratou, na, haere ana maua ki a Hamuera.
- 15
- Ano ra ko te matua kēkē o Haora, Tena ra, whakaaturia mai ki a au, I pehea a Hamuera ki a korua?
- 16
- Na, ko te meatanga atu a Haora ki tona matua kēkē, i ata whakaaturia mai e ia ki a maua kua kitea nga kaihe. Ko te mea ia o te kingitanga, ta Hamuera i korero ra, kihai tena i whakaaturia ki a ia.
- 17
- Katahi ka karangarangatia te iwi e Hamuera ki a Ihowa ki Mitipa.
- 18
- Na, ko tana meatanga atu ki nga tamariki a Iharaira, Ko te kupu tenei a Ihowa Atua o Iharaira, Naku a Iharaira i kawe mai i Ihipa, naku hoki koutou i whakaora i roto i te ringa o nga Ihipiana, i te ringa ano hoki o nga kingi katoa, o nga kai whakatupu kino i a koutou.
- 19
- Na, kua whakakahore nei koutou i tenei ra ki to koutou Atua nana nei koutou i whakaora i roto i o koutou he katoa, i o koutou mate, a kua mea ki a ia, Engari me whakarite e koe he kingi mo matou. Na, me tu koutou aianei i te aroaro o Ihowa; o koutou iwi, o koutou mano.
- 20
- Katahi a Hamuera ka mea i nga iwi katoa o Iharaira kia whakatata mai; na, ka tangohia ko te iwi o Peniamine.
- 21
- Na, ka mea ia i te iwi o Peniamine kia whakatata mai, tenei hapu, tenei hapu, a ka tangohia ko te hapu o Matari, na, ka tangohia a Haora tama a Kihi. Katahi ka rapua ia e ratou, a kahore i kitea.
- 22
- Na, ka ui ano ratou ki a Ihowa, e haere mai ano ranei taua tangata ki konei? Na, ko te meatanga mai a Ihowa, Na, kei nga mea ia e piri ana.
- 23
- Na, ka rere atu ratou, a tangohia mai ana ia i reira, a tu ana ia i waenga nui i te iwi; purero tonu ano ona pokohiwi ki runga ake i te iwi katoa.
- 24
- Na, ko te meatanga ake a Hamuera ki te iwi katoa, Kia kite koutou i ta Ihowa i whiriwhiri ai; kahore hoki he rite mona o te iwi katoa. Na, ka hamama te iwi katoa, ka mea, Kia ora te kingi.
- 25
- Katahi ka korerotia e Hamuera ki te iwi te tikanga o te kingitanga, a tuhituhia ana e ia ki te pukapuka, whakatakotoria ana ki te aroaro o Ihowa. Na, ka tonoa e Hamuera te iwi katoa kia haere ki tona whare, ki tona whare.
- 26
- Me Haora ano hoki i haere ia ki tona whare ki Kipea; a i haere tahi ano i a ia tetahi ropu tangata i whakapakia nei o ratou ngakau e Ihowa.
- 27
- Ko nga tamariki ia a Periara i mea, Ma te aha o tenei tangata e ora ai tatou? Na, whakahaweatia ana ia e ratou, kihai ano hoki i kawea mai he hakari e ratou ki a ia, otiia whakarongo puku tonu ia.
Address: 
Phone: 
Email: