2nd Chronicles Chapter 34 - Paipera Tapu 1868 | Te Paipera Tapu 1868

2nd Chronicles Chapter 34 - Paipera Tapu 1868

1
E waru nga tau o Hohia i tona kingitanga ai, a, e toru tekau ma tahi nga tau i kingi ai ia ki Hiruharama.
2
A, tika tonu tana mahi ki te titiro a Ihowa: i haere hoki ia i runga i nga ara o tona tupuna, o Rawiri; kihai hoki i peka atu ki matau, ki maui.
3
I te waru hoki o nga tau o tona kingitanga, i te mea he taitamariki ano ia, ka timata ia te rapu i te Atua o tona tupuna, o Rawiri; a, i te tekau ma rua o nga tau ka timata ia te tahi atu i te poke o Hura raua ko Hiruharama, ara, i nga wahi tiketike, i nga ngahere, i nga whakapakoko whaowhao, i nga whakapakoko whakarewa.
4
Wahia iho ano hoki e ratou nga aata o nga Paara i tona aroaro, tapahia ana e ia nga whakapakoko o runga ake o aua aata, mongamonga noa i a ia nga ngahere, nga whakapakoko whaowhao, me nga whakapakoko whakarewa, tukia ana e ia kia ririki, ruia atu ana ki runga ki nga urupa o te hunga i patu whakahere ki a ratou.
5
Tahuna ana ano e ia nga wheua o nga tohunga ki runga ki o ratou aata, a tahia ana e ia te poke o Hura, o Hiruharama.
6
Pera ana ano ia i nga pa o Manahe, o Eperaima, o Himeona, a tae noa ki Napatari, he mea mea ki ā ratou karaone, a puta noa, puta noa.
7
A ka oti i a ia nga aata me nga ngahere te wahi iho, me nga whakapakoko whaowhao ano te tuki kia ririki; a, ka poto ano nga whakapakoko te tapatapahi puta noa i te whenua o Iharaira, na, hoki ana ia ki Hiruharama.
8
Na, i te tekau ma waru o nga tau o tona kingitanga, i te mea ka oti nei te poke o te whenua, o te whare, te tahi, ka ungā atu e ia a Hapana tama a Ataria, ratou ko Maaheia kawana o te pa, ko te kai whakamahara ko Ioaha tama a Iehoahata, ki te hanga i te whare o Ihowa o tona Atua kia pai.
9
Na, haere mai ana ratou ki a Hirikia tohunga nui, a, homai ana e ratou te moni i kawea mai ki te whare o te Atua, ta nga Riwaiti, ta nga kai tiaki o nga tatau, i kohikohi mai ai i roto i te ringa o Manahe, o Eperaima, i nga morehu katoa ano hoki o Iharaira, i a Hura katoa, i a Peniamine, i te mea ka hoki mai ratou ki Hiruharama.
10
A, na ratou i hoatu ki te ringa o nga kai mahi i tohutohu nei i te whare o Ihowa, a, hoatu ana e enei ki nga kai mahi i mahi nei i te whare o Ihowa, hei hanga i nga pakaru, hei whakapai i te whare.
11
I hoatu hoki e ratou ki nga kamura, ki nga kai hanga, hei hoko i nga kohatu tarai, i nga rakau mo nga hononga, hei whakanoho rakau ano hoki ki nga whare i kore nei i nga kingi o Hura.
12
A, pono tonu te mahinga a aua tangata i te mahi; na, nga kai tohutohu i a ratou, ko Iahata, ko Oparia, he Riwaiti, no nga tama a Merari; ratou ko Hakaraia, ko Mehurama, no nga tama a nga Kohati, hei whakahohoro; me etahi atu ano o nga Riwaiti, te hunga mohio katoa ki nga mea waiata.
13
Ko ratou ano hei rangatira mo nga kai pikau, hei kai tirotiro ano hoki mo te hunga katoa e mahi ana i tenei mahi ranei, i tera mahi ranei; ko etahi ano o nga Riwaiti hei karaipi, hei kai tohutohu, hei kai tiaki kuwaha.
14
Na, i ta ratou maunga atu i te moni i kawea mai nei ki te whare o Ihowa, ka kitea e te tohunga e Hirikia te pukapuka o te ture a Ihowa i homai nei e Mohi.
15
Na, ko te ohonga mai o Hirikia, ka mea ki a Hapana karaipi, Kua kitea e ahau te pukapuka o te ture i roto i te whare o Ihowa. A, homai ana te pukapuka e Hirikia ki a Hapana.
16
A, na Hapana i kawe te pukapuka ki te kingi. I whakahokia mai ano e ia te korero ki te kingi; i mea ia, Nga mea katoa i homai ki te ringa o o pononga, e meatia ana e ratou.
17
I ringitia hoki e ratou te moni i kitea i roto i te whare o Ihowa, a, hoatu ana ki te ringa o nga kai tirotiro, ki te ringa ano hoki o nga kai mahi.
18
I korero mai ano a Hapana karaipi ki te kingi, i mea, Kua homai he pukapuka ki a au e Hirikia tohunga. A korerotia ana e Hapana i te aroaro o te kingi.
19
A, te rongonga o te kingi i nga kupu o te ture, haea ana e ia ona kakahu.
20
Katahi te kingi ka whakahau atu ki a Hirikia, ratou ko Ahikama tama a Hapana, ko Aparono tama a Mika, ko Hapana karaipi, ko Ahaia ko tetahi tangata a te kingi, ka mea,
21
Haere, ui atu ki a Ihowa moku, mo nga morehu ano o Iharaira, o Hura, ara, te tikanga o nga kupu o te pukapuka kua kitea nei: he nui hoki te riri a Ihowa kua ringitia nei ki a tatou, no te mea kihai o tatou mātua i pupuri i te kupu a Ihowa, kihai i mahi i nga mea katoa i tuhituhia ki tenei pukapuka.
22
Na, haere ana a Hirikia, ratou ko ā te kingi i whakarite ai, ki a Hurura ki te wahine poropiti, he wahine ia na Harumu na te kai tiaki kakahu, he tama hoki tera na Tikiwata tama a Haharaha: i Hiruharama hoki taua wahine e noho ana, i te wahi tuarua. Na, korerotia ana enei mea e ratou ki a ia.
23
Na, ko tana meatanga mai, Ko te korero tenei a Ihowa Atua o Iharaira, Mea atu ki te tangata nana koutou i tono mai ki a au,
24
Ko ta Ihowa kupu tenei, Tenei au te kawe atu nei i te kino mo tenei wahi, mo nga tangata ano hoki o konei, ara, nga kanga katoa kua oti na te tuhituhi ki te pukapuka i korerotia ra i te aroaro o te kingi o Hura;
25
Mo ratou i whakarere i a au, i tahu whakakakara hoki ki nga atua ke, hei whakapataritari i a au ki nga mahi katoa a o ratou ringa; koia taku riri ka ringitia ai ki tenei wahi; e kore ano e tineia.
26
Na, kia penei to koutou ki atu ki te kingi o Hura, nāna nei koutou i tono mai ki te ui ki a Ihowa, Ko te kupu tenei a Ihowa Atua o Iharaira, Na, nga kupu i rongo ra koe,
27
E whakaaro ana ahau e ngawari ana tou ngakau, a, kua whakaiti koe i a koe ki te aroaro o te Atua; i tou rongonga ki ana kupu mo tenei wahi, mo ona tangata ano hoki, na, whakaiti ana koe i a koe ki toku aroaro, haehae ana i ou kakahu, tangi ana ki toku aroaro; kua whakarongo ano ahau, e ai ta Ihowa,
28
Nana, ka huihuia atu koe e ahau ki ou mātua, ka huihuia atu koe ki tou tanumanga i runga i te rangimarie; e kore ano hoki ou kanohi e kite i nga kino katoa e kawea mai e ahau ki tenei wahi, ki nga tangata ano o konei. Na, whakahokia ana te korero e ratou ki te kingi.
29
Katahi te kingi ka tono tangata atu, a, huihuia mai ana e ia nga kaumatua katoa o Hura, o Hiruharama.
30
Na, haere ana te kingi ki te whare o Ihowa, ratou tahi ko nga tangata katoa o Hura, ko nga tangata ano hoki o Hiruharama, me nga tohunga, me nga Riwaiti, me te iwi katoa, te rahi, te iti. Katahi ka korerotia e ia ki o ratou taringa nga kupu katoa o te pukapuka o te kawenata i kitea nei ki te whare o Ihowa.
31
Na, tu ana te kingi ki tona turanga, a, whakaritea ana e ia he kawenata ki te aroaro o Ihowa, ara, kia whakapaua tona ngakau, tona wairua ki te whai ki a Ihowa, ki te pupuri i ana whakahaunga, i ana whakaaturanga, i ana tikanga, ki te whakamana ano i nga kupu o te kawenata kua tuhituhia nei ki tenei pukapuka.
32
I whakaturia ano e ia te hunga katoa i kitea ki Hiruharama, ki Peniamine. Na, ka mahia e nga tangata o Hiruharama nga mea o te kawenata a te Atua, a te Atua o o ratou mātua.
33
I whakakahoretia ano hoki e Hohia nga mea whakarihariha katoa, o nga whenua katoa i nga tamariki a Iharaira; a, whakamahia ana e ia nga tangata katoa i kitea ki a Iharaira, kia mahi ki a Ihowa, ki to ratou Atua. I ona ra katoa kihai i mahue i a ratou te whai i a Ihowa, i te Atua o o ratou mātua.