- 1
- Na, e whitu tekau nga tama a Ahapa i Hamaria. Na ka tuhituhi pukapuka a Iehu, a, ungā ana e ia kia kawea ki Hamaria ki nga rangatira o Ietereere, ki nga kaumatua ratou ko nga kai atawhai i nga tamariki a Ahapa, ka mea.
- 2
- Na, aianei, ka tae atu tenei pukapuka ki a koutou, kei a koutou na hoki nga tama a to koutou ariki, kei a koutou ano hoki nga hariata me nga hoiho, me te pa kua oti te taiepa, me nga mea whawhai;
- 3
- Ma koutou e titiro iho te tama a to koutou ariki e pai ana, e tika ana, ka whakanoho ki runga ki te torona o tona pāpā, ka whawhai mo te whare o to koutou ariki.
- 4
- Na, nui whakaharahara to ratou wehi, i mea ratou, Nana, tokorua nga kingi kihai i tu ki tana aroaro, a, me pehea tatou ka tu ai.
- 5
- Na, ka unga tangata mai te rangatira o te whare, ratou ko te rangatira o te pa, ko nga kaumatua, ko nga kai atawhai, ki a Iehu, hei mea, He pononga matou nau, me mea ano hoki e matou nga mea katoa e kiia mai e koe ki a matou; e kore matou e whakakingi tangata; mau e mea ta to kanohi i whakapai ai.
- 6
- Na, ka tuhituhi pukapuka ano ia ki a ratou, ka mea, Ki te mea kei a au koutou, a ka rongo koutou ki toku reo, tangohia nga upoko o aua tangata, o nga tama a to koutou ariki, ka haere mai ki a au i te penei apopo ki Ietereere. Na, kei nga tangata nui o te pa, kei o ratou kai whakatupu nga tama a te kingi, e whitu tekau nga tangata.
- 7
- Na, te taenga atu o taua pukapuka ki a ratou, ka mau ratou ki nga tama a te kingi: patua iho e ratou, e whitu tekau nga tangata, whaowhina ana o ratou upoko ki nga kete, a, ungā atu ana kia kawea ki a ia ki Ietereere.
- 8
- Na, ka tae mai te karere, ka korero ki a ia, ka mea, Kua kawea mai e ratou nga upoko o nga tama a te kingi. Ano ra ko ia, Waiho i te kuwaha o te keti kia rua nga puranga, kia taea noatia ra ano te ata.
- 9
- Na, i te ata ka puta atu ia ki waho, ka tu, ka korero ki te iwi katoa, He tika koutou. Nana, i whakatupu ahau i te he mo toku ariki, patua iho e au. Na wai ra enei katoa i patu?
- 10
- Na, kia mohio koutou, e kore e taka ki te whenua tetahi wahi o ta Ihowa korero, i korero ai a Ihowa, mo te whare o Ahapa; heoi ka oti i a Ihowa tana korero i whakapuakina e tana pononga e Iraia.
- 11
- Patua ana hoki e Iehu nga mea katoa i mahue o te whare o Ahapa i Ietereere, ana tangata rarahi me ona tangata i mohio ai ia me ona tohunga a, kore noa iho tetahi morehu ona i mahue.
- 12
- Na, whakatika ana ia, turia atu ana e ia, haere ana ki Hamaria. I a ia ano i te whare kutikuti hipi i te ara,
- 13
- Ka tutaki a Iehu ki nga teina o Ahatia kingi o Hura, a ka mea atu, Ko wai koutou? Ano ra ko ratou, He teina matou no Ahatia, a, e haere ana ki raro ki te oha atu ki nga tama a te kingi, ki nga tama hoki a te kuini.
- 14
- Ano ra ko ia, Hopukia oratia. Na, hopukia oratia ana e ratou; patua iho ki te rua i te whare kutikuti hipi, e wha tekau ma rua aua tangata, kihai hoki tetahi tangata o ratou i mahue.
- 15
- Haere atu ana ia i reira, a, tupono atu ko Ionarapa tama a Rekapa e haere mai ana ki te whakatau. Na, ka oha atu ia ki a ia, a ka mea ki a ia, E tika ana ranei tou ngakau, e rite ana ranei ki toku ngakau e mea nei ki tou ngakau? Ano ra ko Ionarapa, Koia ano tena. Ki te mea ko te tikanga tena, homai tou ringa. Na, hoatu ana e ia tona ringa, a ka meinga e tera kia eke ki a ia ki runga ki te hariata.
- 16
- Na, ka mea tera kia ia, Haere mai taua, kia kite ai koe i taku whakaaro nui ki a Ihowa. Na, ka meinga ia e ratou kia rere i runga i tona hariata.
- 17
- Tona taenga atu ki Hamaria, patua iho e ia te hunga katoa o Ahapa i mahue ki Hamaria, a, poto noa ratou; peratia ana me ta Ihowa kupu i korerotia e ia ki a Iraia.
- 18
- Katahi ka huihuia te iwi katoa e Iehu, ka mea ia ki a ratou, He iti nei ta Ahapa mahi ki a Paara: nui atu ia ta Iehu mahi ki a ia.
- 19
- Na, karangatia aianei nga poropiti katoa a Paara, ana tangata katoa, me ona tohunga katoa, ki a au. Kei ngaro atu tetahi; no te mea he whakahere nui taku ki a Paara: nga tangata katoa e ngaro atu ana, e kore e ora. Heoi he mahi tinihanga to Iehu, kia whakangaromia ai e ia nga tangata Paara.
- 20
- Na, ko te meatanga ake a Iehu, Whakatapua he huihui nui ki a Paara. Na, karangatia ana e ratou.
- 21
- Katahi a Iehu ka unga tangata atu puta noa i a Iharaira katoa, a ka haere mai nga tangata katoa a Paara; kihai tetahi i mahue atu; hore rawa tetahi i kore te haere mai. Na, haere mai ana ratou ki te whare o Paara, a, kikī ana te whare o Paara tetahi pito, tetahi pito.
- 22
- Na, ko tana kianga atu ki te kai tiaki kakahu, Kawea mai he kakahu mo nga tangata katoa a Paara. Na, kawea mai ana e ia he kakahu mo ratou.
- 23
- Na, haere ana a Iehu raua ko Ionarapa tama a Rekapa ki te whare o Paara: ka mea ia ki nga tangata a Paara, Rapua, tirohia iho, kei noho ki konei ki a koutou tetahi o nga tangata a Ihowa; engari ko nga tangata anake a Paara.
- 24
- Na, haere ana ratou ki te mea i nga whakahere i nga tahunga tinana. Heoi whakaturia ana e Iehu ki waho etahi tangata e waru tekau, a ka mea, Te tangata e tukua ana e ia tetahi o te hunga i kawea mai nei e ahau ki o koutou ringa, ko tona matenga hei utu mo to tera matenga.
- 25
- Te mutunga o tana mea whakahere, ka mea a Iehu ki nga kai tiaki ratou ko nga rangatira, Haere ki roto, patua ratou; kei puta tetahi ki waho. Na, patua iho e ratou ki te mata o te hoari, makā ana e nga kai tiaki ratou ko nga rangatira ki waho. Katahi ratou ka haere ki te pa o te whare o Paara.
- 26
- A, whakaputaina mai ana e ratou nga whakapakoko o te whare o Paara ki waho, tahuna atu e ratou ki te ahi.
- 27
- Wahia ana hoki e ratou te whakapakoko o Paara; wahia ana te whare o Paara, meinga ana hei whare paru, a tae noa ki tenei ra.
- 28
- Na, kua moti i a Iehu a Paara i roto i a Iharaira.
- 29
- Ko nga hara ia o Ieropoama tama a Nepata i meinga ai e ia a Iharaira kia hara, kihai era i mahue te whai e Iehu, ara, nga kuao kau koura i Pete-ere, i Rana.
- 30
- I mea ano ia a Ihowa ki a Iehu, Na, kua pai nei tau, kua mahia te tika ki toku aroaro: rite tonu ki nga mea katoa i toku ngakau tau i mea ai ki te whare o Ahapa, e wha nga whakatupuranga o o tamariki e noho ki runga ki te torona a Iharaira.
- 31
- Heoi kihai i mau ta Iehu whakapau i tona ngakau ki te haere i runga i te ture a Ihowa Atua o Iharaira, kihai i mahue i a ia nga hara o Ieropoama i meinga ai e ia a Iharaira kia hara.
- 32
- I aua ra ka timata a Ihowa te tapahi i nga taha o Iharaira: i patua hoki ratou e Hataere i nga rohe katoa o Iharaira.
- 33
- I Horano atu whaka-te-rawhiti, te whenua katoa o Kireara, nga Kari, nga Reupeni, nga Manahi; i Aroere atu, i tera i te taha o Awa Aranona, ara, a Kireara, a Pahana.
- 34
- Na, era atu meatanga a Iehu, me ana mahi katoa, me ana mahi toa katoa, kahore ianei i tuhituhia ki te pukapuka o nga meatanga o nga ra o nga kingi a Iharaira?
- 35
- Na, kua moe a Iehu ki ona mātua, a, tanumia iho e ratou ki Hamaria, a, ko tana tama ko Iehoahata hei kingi i muri i a ia.
- 36
- Na, nga ra i kingi ai a Iehu ki a Iharaira i Hamaria e rua tekau ma waru nga tau.
Address: 
Phone: 
Email: