- 1
- To te ture hoki he atarangi no nga pai e puta mai ana i muri, ehara hoki i te ahua pu o nga mea, heoi e kore rawa e whai mana i aua patunga tapu e whakaekea tonutia atu ana e ratou i tenei tau i tenei tau, hei mea e tino tika ai te hunga e whai mai ana ki reira.
- 2
- Penei e kore ranei e mutu te whakaeke atu? me he mea hoki kua oti rawa te hunga nāna taua karakia te mea kia ma, kua kore o ratou maharatanga iho ki nga hara.
- 3
- I aua patunga tapu ia e hokihoki ana te mahara ki nga hara i ia tau i ia tau.
- 4
- E kore hoki e tau ma nga toto o nga puru o nga koati e whakakahore nga hara.
- 5
- Na reira i a ia e haere mai ana ki te ao, ka mea ia, Kihai i matenuitia e koe te patunga tapu me te whakahere, kua rite mai i a koe he tinana moku.
- 6
- Kihai koe i ahuareka ki nga tahunga tinana ki nga whakahere hara:
- 7
- Katahi ahau ka mea atu, Tenei au te haere atu nei, (kei roto i te upoko o te pukapuka te tuhituhinga moku,) ki te mea i tāu i pai ai, e te Atua.
- 8
- I tana meatanga i mua ake nei, Kihai koe i matenui ki te patunga tapu ki te whakahere ki nga tahunga tinana me nga whakahere hara, kahore ano hoki ou ahuarekatanga mai, ki nga mea e tapaea atu ana i runga i te ture;
- 9
- Katahi ia ka mea, Tenei ahau te haere nei ki te mea i tāu i pai ai, e te Atua. E tangohia ana e ia te tuatahi, kia whakaturia ai e ia te tuarua.
- 10
- Na taua pai nei i oti ai tatou te whakatapu, he meatanga na te tapaenga atu kotahi o te tinana o Ihu Karaiti.
- 11
- Na, nga tohunga katoa, e tu ana ratou e minita ana i tenei ra i tenei ra, he maha ano hoki a ratou whakaekenga atu i aua patunga tapu na ano, e kore rawa nei e tau hei tango i nga hara:
- 12
- Ko tenei ia, kotahi nei tana patunga tapu i whakaeke atu ai mo nga hara, na, noho tonu ana i te ringa matau o te Atua;
- 13
- I muri nei he tatari tana kia waiho ra ano ona hoa riri hei takahanga mo ona waewae.
- 14
- Kotahi nei hoki tana whakahere, a tika tonu i a ia ake ake te hunga ka oti te whakatapu.
- 15
- Hei kai whakaatu ano te Wairua Tapu mo tenei ki a tatou: i muri nei hoki i tana kianga mai i mua,
- 16
- Ko te kawenata tenei e whakaritea e ahau ki a ratou i muri iho i aua ra, e ki ana te Ariki, Ka hoatu e ahau aku ture ki o ratou ngakau, ka tuhituhia ano e ahau ki o ratou hinengaro;
- 17
- E kore ano hoki e maharatia e ahau a ratou hara a ratou hē, ake ake ake.
- 18
- Na, ki te murua enei, kahore he whakahere mo nga hara i muri iho.
- 19
- Na, ka ai nei nga toto o Ihu hei take e maia ai tatou te tomo atu ki te tino wahi tapu,
- 20
- Hei ara hou mo tatou, ara ora, he mea whakatapu ano nāna, e tika atu ana na te arai, ara, na tona kikokiko;
- 21
- A he nui ano hoki to tatou tohunga mo te whare o te Atua;
- 22
- Kia whakatata atu tatou, ko te ngakau ano kia pono, kia pumau rawa hoki te whakapono, he mea tāuhiuhi ano te ngakau kia kore ai te hinengaro kino, he mea horoi ano hoki te tinana ki te wai mārama.
- 23
- Kia mau ta tatou whakaae ki te mea e tumanakohia atu nei, kei ngaueue; (he pono hoki ta te Kai whakaari mai;)
- 24
- Kia whai whakaaro ano tatou tetahi ki tetahi, kia whakaohokia te aroha me nga mahi pai:
- 25
- Kei mahue ano hoki to tatou huihui i a tatou ano, kei pera me te hanga a etahi; engari me whakahauhau tetahi i tetahi: kia nui rawa ano hoki i te mea ka kite koutou ka tata te ra.
- 26
- Ki te hara hoki tatou me te whakaae ano te ngakau i muri iho i a tatou kua whiwhi ki te matauranga ki te pono, kahore atu he patunga tapu i mahue mo nga hara;
- 27
- Engari he tatari ahua mataku nei ki te whakawakanga, ki te riri tua-ahi nei e pareho ai nga hoa riri.
- 28
- Te tangata i whakorekore ki te ture a Mohi kihai i tohungia; tokorua tokotoru nga kai whakaatu ka mate ia:
- 29
- Ki ta koutou whakaaro, e kore ranei e tika kia rahi ake te whiu mo te tangata, i takahia ai te Tama a te Atua, i meinga ai hei mea noa nga toto o te kawenata i whakatapua ai ia, a whakaiti ana i te Wairua o te aroha noa?
- 30
- E mātau ana hoki tatou na wai tenei kupu, Maku te rapu utu; maku te hoatu utu, e ai ta te Ariki: me tenei ano, E whakarite whakawa te Ariki mo tona iwi.
- 31
- He mea mataku te taka ki roto ki nga ringaringa o te Atua ora.
- 32
- Engari kia mahara ki nga ra o mua, i a koutou i whakamaramatia ra, a nui noa te totohetanga mai o nga mate, i whakaririka kau na koutou;
- 33
- Tetahi wahi, i a koutou i meinga e nga tawainga e nga tukinotanga hei mea e matakitakina ana; tetahi wahi, i a koutou i meinga hei hoa mo te hunga i peratia.
- 34
- I mamae tahi hoki koutou me au i a au i te herehere, i hari hoki ki te pahuatanga o o koutou taonga, i mahara hoki tera atu he taonga mo koutou he mea pai ake e mau tonu ana i te rangi.
- 35
- Na, kaua e whakarerea to koutou maia, he rahi hoki tona utu.
- 36
- Te mea hoki hei matenuitanga ma koutou he manawanui; kia mahia ai e koutou ta te Atua i pai ai, a riro tonu mai i a koutou nga mea i whakaaria mai ra.
- 37
- Potopoto kau ake hoki, a ka tae mai tenei e haere mai nei, e kore ano e whakaroa.
- 38
- Na, ma te whakapono e ora ai te tangata tika: a ki te hoki tetahi ki muri, e kore toku wairua e ahuareka atu ki a ia.
- 39
- Na, ehara tatou i te hunga e hoki ana ki muri ki te whakangaromanga, engari no te hunga e whakapono ana, a ora ana te wairua.
Address: 
Phone: 
Email: