Joshua Chapter 2 - Paipera Tapu 1868 | Te Paipera Tapu 1868

Joshua Chapter 2 - Paipera Tapu 1868

1
Na kua tonoa noatia ake e Hohua, tama a Nunu, nga tangata tokorua i Hitimi, hei tutei puku atu, i mea ia, Tikina, tirohia te whenua, me Heriko hoki. Na, haere ana raua, a ka tae ki te whare o tetahi wahine puremu, tona ingoa ko Rahapa, a moe ana i reira.
2
Na, ka korerotia mai ki te kingi o Heriko, ka meatia mai, Nana, kua tae mai etahi tangata ki konei i te po nei, no nga tamariki a Iharaira, he whakataki mo te whenua.
3
Na, ka tono tangata atu te kingi o Heriko ki a Rahapa, ka mea, Whakaputaina mai ki waho nga tangata i haere mai na ki a koe, i haere atu na ki tou whare: i haere mai hoki raua he whakataki mo te whenua katoa.
4
Na, ka tango te wahine i nga tangata tokorua, ka huna hoki i a raua; a i penei tana ki atu, I haere mai ano nga tangata ki a au, heoi, kihai ahau i mohio nohea ranei raua:
5
A no te tutakitanga o te kuwaha, no te mea ka pouri nei, na ka puta atu aua tangata ki waho; kahore au e mohio i haere ranei aua tangata kihea: kia hohoro te whai i muri i a raua; ka mau hoki raua i a koutou.
6
Kaore, kua kawea raua e ia ki runga ki te tuanui, a hunā ana raua ki nga kakau harakeke, i horahorangia e ia ki runga i te tuanui.
7
Na, ka whai nga tangata i muri i a raua, na te huarahi ki Horano, a tae noa ki nga whakawhitinga: a tutakina ana e ratou te kuwaha, i te putanga atu ano o nga kai whai i muri i a raua.
8
A kiano ratou i takoto noa, na, ka haere ake ia ki a raua ki te tuanui;
9
A ka mea ki aua tangata, E mohio ana ahau kua hoatu te whenua nei e Ihowa ki a koutou, kua tau mai hoki te wehi o koutou ki a matou, a ngohe noa nga tangata katoa o te whenua nei i a koutou.
10
I rongo hoki matou ki ta Ihowa whakamaroketanga i te wai o te Moana Whero, he whakaaro hoki ki a koutou, i to koutou putanga mai i Ihipa; ki nga mea hoki i meatia e koutou ki nga kingi tokorua o nga Amori, i tera taha o Horano, ki a Hihona raua ko Oka, i hunā nei e koutou.
11
A, to matou rongonga ai, na, ngohe noa o matou ngakau, kahore atu hoki he tokonga ake o te wairua i roto i tetahi tangata, na koutou hoki: ta te mea ko Ihowa ko to koutou Atua, ko ia te Atua i te rangi i runga, i te whenua hoki i raro.
12
Na, tena ra, oatitia mai a Ihowa ki a au; (mo taku whakahaere atawhai hoki ki a korua,) ka atawhai hoki koutou ki te whare o toku matua, homai hoki he tohu pono ki a au:
13
Ka whakaora hoki i toku papa, i toku whaea, i oku tungane, i oku tuakana, me a ratou mea katoa, a ka araarai i a matou kei mate.
14
Na, ka mea mai aua tangata ki a ia, Ki te mate, ko maua ano ki raro i a koutou, ki te kahore koutou e whakaatu i ta maua nei mea. A, tenei ake, kei te homaitanga a Ihowa i te whenua ki a matou, na, ka puta ta matou mahi atawhai, ta matou mahi pono, ki a koe.
15
Na, tukua iho ana raua e ia ki tetahi taura na te matapihi: no te mea kei te taiepa tonu o te pa tona whare, a e noho ana ia i runga i te taiepa.
16
A i mea ano ia ki a raua, Haere atu ki te maunga, kei tutaki nga kai whai ki a korua; ka piri ai ki reira, kia toru nga ra, kia hoki mai ra ano nga kai whai: katahi korua ka haere i to korua huarahi.
17
Katahi ka mea mai aua tangata ki a ia, E kore maua e whai hara mo tenei oati au i whakaoati nei koe i a maua.
18
Nana, ka tae mai matou ki tenei whenua, herea tenei miro, te aho whero nei, ki te matapihi i tukua iho nei maua e koe na reira; ko to papa hoki, me to whaea, me o tungane, me te nohoanga katoa o to papa, me huihui mai ki a koe, ki roto ki te whare.
19
Na, nga tangata katoa e puta atu ana, ki waho o nga tatau o to whare, hei runga ano i tona mahunga ona toto, ko maua ia ka hara-kore; tena ko nga tangata katoa i roto tahi koutou i te whare, hei o maua mahunga ona toto, ki te pa atu tetahi ringaringa ki a ia.
20
A ki te korero koe i tenei, i ta maua mea, katahi maua ka mawheto i to oati i whakaoati nei koe i a maua.
21
Ano ra ko ia, Waiho i ta korua i mea na. A tukua atu ana raua e ia, haere ana raua: a herea ana e ia te aho whero ki te matapihi.
22
Na, haere ana raua, a ka tae ki te maunga, a noho ana i reira, e toru nga ra, a hoki noa mai nga kai whai: a rapu ana nga kai whai i a raua i te huarahi katoa, a kahore i kitea.
23
Katahi ka hoki aua tangata tokorua, ka heke iho i te maunga, a ka whiti, ka tae atu ki a Hohua, tama a Nunu, ka korero atu hoki ki a ia i nga mea katoa i pono mai ki a raua:
24
I mea hoki raua ki a Hohua, Koia ano, kua homai e Ihowa te whenua katoa ki o tatou ringaringa; a ngohe kau nga tangata katoa o te whenua nei i a tatou.