- 1
- Na, i muri iho i enei mea ka whaka- ritea ano hoki e te Ariki etahi atu e whitu tekau, a tonoa ana ratou takirua takirua ki mua i tona aroaro, ki nga pa katoa ki nga wahi meake nei ia haere ki reira.
- 2
- I mea ano ia ki a ratou, Ko te kotinga e nui ana, ko nga kai mahi ia e ruarua ana: na, inoi atu ki te Ariki nāna te kotinga, kia tonoa mai e ia he kai mahi ki tana kotinga.
- 3
- Haere: nana, ka tonoa nei koutou e ahau, ano he reme ki waenganui o nga wuruwhi.
- 4
- Kaua e mauria he takotoranga moni, kaua he putea, kaua ano hoki he hu: kaua ano hoki e oha atu ki tetahi i te huarahi.
- 5
- A ka tomo koutou ki tetahi whare, ka mātua mea atu, Kia tau te rangimarie ki tenei whare.
- 6
- A ki te mea kei reira te tama a te rangimarie, ka tau ta koutou rangimarie ki reira: ki te kahore, e hoki mai ano ki a koutou.
- 7
- Na, hei taua whare koutou noho ai, ka kai ai ka inu ai i ta ratou e homai ai: ka tika hoki te utu mo te kai mahi. Kaua e haereere i tenei whare ki tera whare.
- 8
- A ka tomo koutou ki tetahi pa, a ka manako mai ratou ki a koutou, kainga nga mea e whakatakotoria ana ma koutou:
- 9
- Me whakaora te hunga mate o reira, ka mea atu ki a ratou, Kua tata mai ki a koutou te rangatiratanga o te Atua.
- 10
- Tena ki te tomo koutou ki tetahi pa, a e kore ratou e manako ki a koutou, me haere atu ki nga huarahi o reira, me ki atu,
- 11
- Te puehu nei o to koutou pa e piri nei ki a matou, tenei te mukua atu nei e matou ki a koutou: otira kia mohio koutou ki tenei, kua tata mai ki a koutou te rangatiratanga o te Atua.
- 12
- Ko taku kupu tenei ki a koutou, Engari to Horoma i taua ra e māmā i to taua pa.
- 13
- Aue te mate mou, e Korahina! aue te mate mou, e Petahaira! me i meatia hoki ki Taira ki Hairona nga merekara kua meatia nei ki a korua, kua ripeneta ke raua, he taratara hoki te kakahu, me te noho i roto i te pungarehu.
- 14
- Otira erangi to Taira to Hairona i te ra whakawa e māmā i to korua.
- 15
- Me koe hoki, e Kaperenauma, e ikeike na, a tutuki noa ki te rangi, ka whakatakā koe ki te reinga.
- 16
- Ki te whakarongo tetahi ki a koutou, e whakarongo ana ia ki a au; a ki te whakakahore tetahi ki a koutou, e whakakahore ana ia ki a au; a ki te whakakahore tetahi ki a au, e whakakahore ana ki toku kai tono mai.
- 17
- Na, ka hoki hari mai aua tekau e whitu, ka mea, E te Ariki, nga rewera na ano rongo tonu ki a matou, he mea hoki na to ingoa.
- 18
- A ka mea ia ki a ratou, I kite ahau i a Hatana, ano he uira, e taka iho ana i te rangi.
- 19
- Na, ka hoatu nei e ahau ki a koutou he mana e haere ai koutou i runga i nga nakahi i nga kopiona, i te kaha katoa ano hoki o te hoa whawhai: a e kore rawa koutou e mate i tetahi mea.
- 20
- Otira kaua koutou e hari ki tenei, ki nga wairua ka riro nei ki raro i a koutou; ko ta koutou ia e tino hari ai, ko o koutou ingoa kua oti te tuhituhi ki te rangi.
- 21
- I taua wa ano ka hari te wairua o Ihu, a ka mea ia, Ka whakawhetai atu ahau ki a koe, e Pa, e te Ariki o te rangi o te whenua, kua hunā nei hoki e koe enei mea i te hunga mātau i te hunga mahara, a hurahia atu ana ki nga kohungahunga: ae ra, e Pa, i pai hoki te penei ki tau titiro.
- 22
- Kua oti nga mea katoa te tuku mai ki a au e toku Matua: e kore ano hoki tetahi e mātau ki te Tama ko wai ia, ko te Matua anake; ko wai ranei te Matua, ko te Tama anake, me te tangata ano hoki e pai ai te Tama kia whakakitea ia.
- 23
- Na, ka tahuri ia ki nga akonga, ka mea puku atu, Ka hari nga kanohi e kite ana i nga mea e kite nei koutou:
- 24
- Ko taku kupu hoki tenei ki a koutou, he tokomaha nga poropiti me nga kingi i hiahia kia kite i nga mea e kite nei koutou, a kahore i kite; kia rongo ano i nga mea e rongo nei koutou, a kahore i rongo.
- 25
- Na, ka whakatika tetahi kai whakaako o te ture, ka whakamatautau i a ia, ka mea, E te Kai whakaako, me aha ahau ka whiwhi ai ki te oranga tonutanga?
- 26
- Ka mea mai ia ki a ia, He aha te mea i tuhituhia ki te ture? ka pehea to korerotanga?
- 27
- Na, ka whakahokia atu e ia, ka mea, Kia whakapaua tou ngakau, tou wairua, tou kaha, tou hinengaro, ki te aroha ki te Ariki ki tou Atua; me aroha hoki ki tou hoa tata, ano ko koe.
- 28
- Ka mea mai ia ki a ia, Ka tika to korero: meinga tenei, a ka ora koe.
- 29
- Na, ka mea ia kia whakatika i a ia, a ka kī atu ki a Ihu, Ko wai ra taku hoa tata?
- 30
- Na, ka whakahokia mai e Ihu, ka mea, I haere atu tetahi tangata i Hiruharama ki Heriko, a ka tutaki ki nga kai pahua, na, ka huia ona e ratou, ka tukitukia ia, a haere ana, whakarerea iho ia, me te mea kua mate.
- 31
- Na, ko tetahi tohunga e haere noa ana i taua ara: a, tona kitenga i a ia, ninihi ke atu ana na tahaki.
- 32
- I pena hoki tetahi Riwaiti, tae kau ki taua wahi, ka haere ka titiro, ninihi ke atu ana na tahaki.
- 33
- Na, ko tetahi Hamari e haere ana ki nga whenua, te taenga mai ki a ia, ka kite i a ia, ka aroha,
- 34
- Na, ka haere atu, ka takai i ona patunga, ringihia iho ki te hinu ki te waina, ka whakanoho i a ia ki tona ake kararehe, a kawea ana ia ki te whare tira, atawhaitia ana ia.
- 35
- I te aonga ake, i tona haerenga, ka tangohia e ia nga pene e rua, a hoatu ana ki te tangata i te whare, ka mea ki a ia, Māu ia e tiaki; a ki te maha atu āu mea e pau, maku koe e utu ina hoki mai ahau.
- 36
- Na, ki tau whakaaro, ko wai tenei tokotoru te hoa ona i tutaki nei ki nga kai pahua?
- 37
- Ka mea ia, Ko tera i atawhaitia ai ia. Ka mea ano a Ihu ki a ia, Haere, kia pera ano hoki tau mahi.
- 38
- A i to ratou haerenga atu, ka tomo ia ki tetahi kāinga: na, ko tetahi wahine ko Māta te ingoa, i whakamanuhiri i a ia ki tona whare.
- 39
- A he teina tona, ko Meri te ingoa, na, ka noho ano tenei ki nga waewae o Ihu, whakarongo ai ki tana kupu.
- 40
- Na, raruraru noa iho a Māta i te nui o te mahi tuari, a haere atu ana, ka mea, E te Ariki, he mea noa oti ki a koe kia waiho nei e toku teina maku anake te tuari? na, korero atu kia haere mai ia hei hoa moku.
- 41
- Ka whakahokia atu e Ihu, ka mea ki a ia, E Māta, e Māta, e manukanuka ana koe e raruraru ana ki nga mea maha:
- 42
- Kotahi ia te mea e matea ana: a kua whiriwhiria e Meri tena wahi pai, e kore nei e tangohia i a ia.